حالة من الغضب انتابت أصحاب المشروعات التجارية الإلكترونية، بسبب الغرامات التى فرضها جهاز حماية المستهلك على الشركات والمؤسسات التى تعلن عن منتج دون إرفاق السعر به، مؤكدين أن حجب السعر ليس مقصوداً به التلاعب فى الأسعار مع الزبائن ولكن هى سياسة تسويقية، هدفها زيادة التفاعل من جانب المستخدمين.
"أنا هدفى الأساسي هو تنشيط الصفحة، وده مش هيحصل لو كتبت السعر على المنتج، عشان كده ببعته على الخاص"، كلمات عبير محمد، صاحبة صفحة لبيع منتجات التجميل للعناية بالبشرة والشعر المستوردة من الخارج، معتبرة أن الأمر ليس سراً، ولكنها سياسة ترويجية تستخدمها الكثير من الشركات والمشروعات التجارية الصغيرة والمتوسطة: "أكيد لو بعرض فى محل هاكتب الأسعار بتاعتى علشان اجذب المستهلك اللى ماشى فى الشارع، لكن فى وسائل التواصل الاجتماعى العكس هو اللى بيحصل، عدم كتابة السعر بيخلى الكومنتات تزيد علشان يعرفوا السعر وده بيخلى البوست متشاف لعدد أكبر من الناس"، مؤكدة أنها فى نهاية الموسم تكتب الأسعار كلها، لافتة إلى أن ذلك لا يستدعى تلك الغرامة الكبيرة التى قررها جهاز حماية المستهلك.
منى منصور، مسئولة تسويق ومبيعات فى صفحة متخصصة فى بيع الفيتامينات المستوردة، اعتبرت أن عبارة "check your box" التى يتم كتابتها على استفسارات الزبائن فى التعليقات الخاصة بالصفحة، الهدف منها تسهيل تقديم المعلومات للزبائن، وليس العكس: "الفكرة أننا بنكون عاملين عروض على منتجات مختلفة، وبتتغير كل فترة، يعنى ساعات بننزل فى أسعار المنتجات، وأحيانا بنقدم منتج والتانى عليه هدية، وعلشان كده بنعمل فكرة الرد على الخاص، لأننا مش بس بنكتب السعر، لكن بنشرح طبيعة المنتج وسعره الأصلى، وعروض التخفيض اللى نازلة عليه، ولو الزبون اشترى كذا منتج ممكن يوفر قد ايه"، مؤكدة أن هذه الطريقة هى الأنفع للزبون، بدلا من اعطائه المعلومة متقطعة: "أنا ببعت له كل التفاصيل بدل ما يدخل يسأل كل شوية، أو يفتكر أنى بضحك عليه، واللى أنا سمعته أن هدفهم من القرار ده فرض ضرايب علينا".
على الرغم من أن دينا على، أنشأت مجموعة خاص على موقعى التواصل الاجتماعى انستجرام وفيس بوك، لبيع الملابس المستوردة، إلا أنها تصمم أن يكون السعر على الخاص، وبررت ذلك: "الخوف هو أن الصفحات والتجار المنافسين للواحد، بيدخلوا يشوفوا أسعار نفس المنتجات اللى بنقدمها، ويخفضوا فيها، فمثلا لو قللوا 50 جنيه بس، أكيد الزبون هيروح لهم، لأن منطق الشرا دايما هو التوفير، خصوصا أن السعر بيضاف عليه بعد شوية سعر الشحن، فبيعمل مبلغ وقدره، فأنا بحط السعر فى الخاص، علشان امنع المنافسين أنهم يعرفوا الأسعار، وعلشان كده عملت جروب خاص، وفكرة الغرامة حرام وصعبة، خصوصا أنها بتوصل لمليون جنيه".
تعليقات الفيسبوك