أمانته وإخلاصه كانا السبب في إنقاذ أحد موظفي البريد في مدينة الشروق، حيث وجد سعيد سرحان، 62 عاماً، موظف بالمعاش، أثناء تقاضي معاشه، زيادة 3 آلاف جنيه، وذلك بعد أن عاد إلى منزله في منطقة عين شمس، فظل أكثر من 6 ساعات يبحث عن الموظف، ليعيد إليه المبلغ الزيادة حتى لا يتحملها من جيبه الخاص.
"ما كنتش عديت الفلوس وأنا بقبض وقلت الموظف أكيد عدهم، ولما روحت البيت عديتهم لقيت فيهم زيادة، أول حاجة فكرت فيها الموظف اللى المفروض بيقفل عهدته كل يوم وصعب عليه يتحمل المبلغ ده، لأنه فى عهدته"، حسب "سعيد"، الذي حرص على إعادة المبلغ قبل انتهاء اليوم: "أول ما اتأكدت إن الفلوس زيادة ما قعدتش في بيتى لحظة واحدة، اتصلت بكل زمايلى وأصدقائى اللى ممكن يكونوا ساكنين قريب من البريد فى مدينة الشروق وسألتهم عن الموظف ده أو أى موظف تانى شغال فى بريد الشروق، وبعد تقريباً 6 ساعات من الاتصال قدرت أوصل لواحد هناك، ومن خلاله وصلنى بالموظف اللى قبضنى المعاش، ومن أول ما كلمته حسيت من صوته إنه غلبان جداً، وفرح قوى لما كلمته وشكرنى كتير وقالى كنت هحط الفلوس دى من جيبى، لأنها عهدة وأنا أصلاً مرتبى مش كبير".
شعور سعيد بحالة القلق التى يعيشها الموظف، فى حال اكتشافه لهذا الخطأ، جعله يسارع للتواصل معه لطمأنته: "أنا كنت موظف زيى زيه وحاسس به وأكيد كان قلقان ومش عارف هيعمل إيه"، وبعد أن استطاع "سعيد" التواصل معه هاتفياً، اتفق معه على مقابلته صباح اليوم التالى، واسترداد عهدته: "قالى أخيراً هنام وأنا مطمن، وبعد كده هركز كويس جداً، وحمد ربنا إنه وقع فى حد زيى قعد يدور عليه".
تعليقات الفيسبوك