ديكورات حفلات "مينى فرح" تبدأ من 10 الآف جنيه
الأزمة الاقتصادية التى سببها فيروس كورونا المستجد، كان لها تداعيات مختلفة، وفى عالم الأعراس وتنظيم حفلات الزفاف، ظهر ما يسمى "ميني فرح" أي تنظيم أفراح بتكلفة بسيطة.
سماح عبد الهادي، مسئولة عن تنظيم حفلات زفاف فى فيلا بمنطقة العبور، أكدت أن هذا المفهوم ظهر على استحياء مع نهاية العام الماضي، لكنه انتشر بقوة مع بداية عام 2020، ووصل إلى أنه سيطر على اختيارات معظم حفلات الزفاف حاليًا مع انتشار فيروس كورونا، مضيفة "الفكرة أن الفرح بيتم تنظيمه بأقل إمكانيات سواء فى الكوشة أو الديكورات المستخدمة فى الفرح، بالإضافة إلى البوفيه اللى ممكن يقتصر على علب الكانز بس".
لا يوجد سعر محدد لـ"المينى فرح" حسب "سماح"، لكنه فى قاعات الأفراح الكبيرة قد يصل إلى 10 آلاف جنيه، والصغيرة 7 آلاف جنيه، وفى الفيلات الخاصة، تبدأ أسعاره من 12 ألف جنيه، ويصل إلى 15 ألفًا، تقول "سماح"، "إحنا نظمنا أفراح فى الفترة من نهاية مايو اللي فات، وكانت كلها عبارة عن ميني فرح، أولاً لأن عدد المعازيم قليل جدًا، وثانيًا كان بيتعمل الصبح علشان ساعات الحظر، والمواصفات دى هى أساس الميني فرح، واللي بيزود دايمًا سعر الأفراح هو البوفيه".
أما سماح الجويلي، صاحبة شركة لتنظيم أفراح، فاعتبرت أن الـ"مينى فرح" موجه أكثر لأبناء الطبقة المتوسطة، فى ظل موجة الركود الاقتصادي وإغلاق كثير من الأنشطة بسبب فيروس كورونا، مضيفة "بنظم أفراح للعرسان بالشكل اللى يحبوه، بوفر كل حاجة هما يطلبوها، فرح في فيلا، قاعة، نادي، جاردن، روف، والميني فرح انتشر لأنه سريع وسهل، وعدد المدعوين قليل، وهو ما يناسب الشباب الصغير اللي لسه متخرج، لكن دايمًا بيكون الاعتراض من الأهل، اللي متعودين على شكل معين للفرح، خصوصًا أهل العروسة، أما الأفراح التقليدية الكبيرة فهي دايمًا من مطالب الهاي كلاس، لأنه بيكون جزء منه شو".
الـ"مينى فرح" حسب "سماح" له شروط، أولها أن عدد المدعوين يكون من 50 إلى 100 فرد، ولمدة ساعتين فقط بدون بوفيه: "بوفر فيه الكراسي والترابيزات والكوشة بس، وبيبسى أو كانز وشيكولاته، وسعره بيبدأ من 12 ألف جنيه ونصف وبيوصل لـ15 ألف جنيه، وفي نوع تاني أعلى بيكون سوبر ميني فرح، وسعره بيبدأ من 18 ألف جنيه، وبيوصل لـ20 ألف جنيه، وده مميزاته أنه بيكون 3 ساعات، وفي جاتوه، وحلويات شرقية".
تعليقات الفيسبوك