البراميل بعد تحويلها لتكييفات
بالتزامن مع ارتفاع درجات الحرارة، والرطوبة والصهد الشديدين، ابتكر محمد عاطف، فنى تكييف وتبريد فى سوهاج، مكيف هواء بارد بتكلفة بسيطة لا تتعدى الـ250 جنيهاً، وذلك باستخدام برميل بلاستيك وشفاط هواء فقط.
«من يومين لما سمعت نشرة الطقس إن الجو هيبقى حر وصهد، فكرت فى إن الصعيد هيبقى جمرة نار، ولأن التكييفات غالية فكرت أعمل حاجة أتغلب بيها على الجو ده»، فى خلال 4 ساعات فقط، كان «محمد» قد نفذ أول تكييف بارد، مصنوع من برميل وشفاط مستعمل: «البرميل اشتريته بـ60 جنيه والشفاط كان عندى وهو بيتباع أصلاً بـ190 جنيه، وبعدين عملت فى البرميل فتحة على قد الشفاط وقفلته كويس، ومن الناحية التانية فتحت مكان صغير وغطيته بقطعة من قماش الخيش، وعملت مكان للحنفية فى آخر البرميل من تحت عشان تفريغ الميه»، ويقوم بتشغيل التكييف من خلال وضع قطع ثلج أو مياه باردة حتى ربع البرميل وتشغيل الشفاط، ليقوم بطرد الهواء البارد: «طول ما أنا قاعد بفضّى وأغيّر الميه وباحس بانتعاش».
قد يبدو تنفيذه معقداً، لكن خطواته بسيطة وسهلة، فى حال تم تنفيذ جميع الخطوات بدقة شديدة: «أهم حاجة كل أداة تكون فى مكانها عشان يطلع مظبوط»، وبعد نجاح فكرته، حرص «محمد» على نشرها بين جيرانه بالصعيد، خصوصاً الأسر البسيطة، مع توجيه بعض النصائح، منها عدم اقتراب الأطفال منه حتى لا يضعوا أصابعهم فى مروحة الشفاط: «كل ما يقابلنى حد فى الشارع باقعد أشرح له عشان يعملها، بقيت شايل همّ الناس من كتر ما الجو بالصعيد والشمس نار، فأى حاجة ترطب علينا اليومين دول، خصوصاً فى عز الصيام ده».
تعليقات الفيسبوك