«أم سيد» ومدربها
عمرها تعدى الـ65 عاماً، لكنها تتمتع بحيوية طفل لا يزال فى عامه الخامس، فحبها للحياة دفعها إلى اكتساب خبرات جديدة، حيث مارست رياضة الكيك بوكسينج، فى نادى بولاق الدكرور الرياضى، لشد قوامها وتقوية عضلاتها.
نجيبة السيد، وشهرتها «أم سيد» تعمل عاملة نظافة، تحرص على توفير ساعة يومياً، لممارسة الرياضة التى تبدو مرهقة لمن فى مثل سنها: «بشوف الناس بيلعبوها وحبيت طريقة لعبهم، قلت أجرب أنا كمان وألعب، وعرفت من الكابتن قبل ما أبدأ فى لعبها إنها بتقوى العضل وبتشد الجسم وبتخلى الصحة حديد»، رغم أنها لم تمارس أى رياضة طوال حياتها، لكن تجربتها الأخيرة، جعلتها تشعر بحيوية ونشاط كبيرين: «زمايلى فى التمرين بيستغربونى، بيقولوا دى جاية تعمل إيه وهى فى السن ده بقول لهم إن الرياضة مالهاش سن».
تمارس «أم سيد» الكيك بوكسينج، منذ شهر ونصف تقريباً، واكتسبت خبرة كبيرة: «بقيت بخرج طاقة سلبية كتير وكل همومى ومشاكلى بنساها وأنا لابسة الجوانتى وبضرب فى كيس الرمل قدامى»، وتحرص أيضاً على ممارسة بعض التمرينات الرياضية البسيطة كالجرى والإطالة، للتسخين قبل بدء التمرين: «حسيت إنى خفيفة وبتحرك كويس وأقدر أشتغل وأروح السوق أجيب طلبات البيت وأرجع أطبخ وأنضف البيت واللى يضايقنى دلوقتى وانا ماشية فى الشارع بقيت بضربه وما بخافش من حد». لا تملك «أم سيد» زياً رياضياً، لكنها حرصت قبل ممارسة الرياضة على شراء جوانتى للتدريب: «الكابتن بتاعى قد ولادى بيقول لى يا حاجة اتمرنى بأى لبس المهم أنك ماتفوتيش التمرين».
تعليقات الفيسبوك