«الأحمر» صاحب مبادرة الركوب بنصف الأجرة
لتخفيف العبء عن الركاب وتشجيعهم على العودة إلى التاكسى، فكر محمد الأحمر، سائق تاكسى من مدينة المحلة الكبرى، فى إطلاق مبادرة حملت اسم «نصف الأجرة»، لإقناع أهالى المدينة بركوب التاكسى، مقابل تمتّعهم بخدمة جيدة وخصم يصل إلى 50%.
يحكى «الأحمر» عن فكرة حملته: «لو حد ركب معايا لوحده، وقال لى وصّلنى لمكان معين، وأنا فى الطريق شاور لى راكب تانى مشواره فى نفس الطريق، هاعتبرهم الاتنين أصحاب أو قرايب، وهاخد من كل واحد نصف الأجرة، ولو محدش ركب، أو الراكب عاوز يركب لوحده بيدفع الأجرة كاملة».
يتحمّس لفكرته التى تدعم السائق والزبون: «السائق أخد أجرته كاملة، والزبون اتعمل له خصم».
لاقت الفكرة إعجاب مجموعة من السائقين، وشاركوه فى تطبيق الخصم الذى حدّده، وبالآلية نفسها، ولتنتشر الفكرة وتجد صدى لدى الركاب، قام «الأحمر» بطباعة استيكر للحملة، ووزعه على السائقين: «عملت الاستيكر على نفقتى الخاصة، واديته للسائقين علشان يلزقوه على التاكسى، والناس تعرف أنه تبع الحملة»، وكذلك روج لفكرته من خلال التجول فى شوارع المحلة، مستخدماً ميكروفوناً للتعريف بالحملة. «أكتر من نصف الركاب رجّعوا لى الفلوس وقالوا لى اشتغل بس وارحمنا من التوك توك».. قالها «الأحمر»، مؤكداً أنه يشعر بسعادة كبيرة بسبب ردود الفعل على الحملة، فيما لاقت هجوماً من عدد قليل من السائقين، حسب قوله: «بعض السائقين قالوا لى هو إحنا مجانين علشان نعمل كده، ده إحنا نخسر، حاولت أوضح لهم الفكرة بإنهم هياخدوا أجرتهم كاملة، ويعتبر اللى ركب بعد كده أخوه، قالوا لى لا هناخد الأجرتين»، متمنياً أن تنتشر فكرته فى جميع أنحاء الجمهورية، لأنها ستحل مشكلة التاكسى المزمنة، موضحاً هدفه الأكبر من الحملة: «باعملها لوجه الله».
تعليقات الفيسبوك