فى محاولة لمراعاة ظروف المواطن البسيط محدود الدخل، انطلقت مبادرة «يلا نساعد بعض» من كشك لبيع المنتجات الغذائية، لطرح سلع بأسعار مخفضة، وتقديم أخرى كهدايا خلال عمليات الشراء.
علاء محمد، أحد العاملين فى الكشك، الذى يقع بجوار كلية الزراعة بمنطقة شبرا، أكد أن الكشك تم تأجيره من قبَل الكلية، بهدف مساعدة الشباب على إيجاد فرص عمل، وفى المقابل قرر الشباب مساعدة غيرهم، بتقديم عروض وتخفيضات على كافة المنتجات التى يتاجرون فيها: «الفكرة إن بعض المنتجات بتيجى لينا بأسعار مخفضة، قُلنا حرام نبيعها للمواطن بضعف تمنها، مش هنخسر حاجة لو قسمنا المكسب بينا وبين الزبون، ونساعد بعض».
«بانر» متوسط الحجم مطبوع بالألوان، علّقه «علاء» فى مدخل «الكشك» بعنوان المبادرة، والعرض الجديد الذى يقدمه للزبائن، وهو عبارة عن تخفيضات على علب «التونة»، مؤكداً أن «البانر» يتغير بحسب عرض التخفيض الذى يتم تقديمه، ولكن لا يتغير اسم المبادرة: «فى البداية الناس افتكرت إننا بنبيع منتجات كلية زراعة، علشان كده بنبيعها بأسعار مخفضة، ولكن بدأنا نوضح للناس اللى بييجوا إننا قررنا ده من نفسنا، بهدف خدمتهم، مش علشان المنتج رخيص أو تم إنتاجه بواسطة طلبة الكلية».
يعترف «علاء» أن تخفيضاتهم أحياناً لا يمكن مقارنتها بالتخفيضات التى تقدمها السلاسل التجارية الكبيرة، ولكنها فى النهاية محاولة تستحق التشجيع: «المنطقة اللى إحنا فيها مفيهاش محلات كبيرة، وكمان إحنا فى موقف للمسافرين من وإلى القاهرة، فأكيد التخفيضات اللى بنقدمها هتفيد حتى ولو كانت بسيطة، وهتوصل لعدد كبير، وفى النهاية كل واحد يساعد باللى يقدر عليه».
تعليقات الفيسبوك