أهم عامل فى أى مقهى شعبى هو المسئول عن رص أحجار الشيشة وتجهيز «الولعة» ووضع كمية مياه مناسبة، وضبط هذه الأدوات بما يرضى أذواق وأمزجة الزبائن، يحتاج خبرة، يمتلكها أحمد محمد، عامل بمقهى فى حى الحواتم، فى محافظة الفيوم، والذى تم تكريمه وإهداؤه شيشة تقديراً لمهارته وتفانيه فى العمل.
نظم الاحتفالية محمد عبدالمنعم، صاحب المقهى، ودعا إليها كل زبائن المقهى، حرصاً منه على تشجيع العامل وتقديراً لجهوده: «أحمد شغال معايا فوق الـ5 سنين، شاطر جداً وأحسن واحد عدّى على القهوة بيعمل شيشة، بيرص حجر بطريقة مظبوطة لدرجة إن ناس كتير مش بتقعد غير فى وقت الشيفت بتاعه»، الاحتفالية لم يحضّر لها مسبقاً، وإنما طرأت على ذهنه فجأة بعدما لاحظ أن كثيراً من الزبائن يمدحون ويشكرون فى جهود العامل: «قررت أشكره قدام الناس كلها عشان أبيّن له قد إيه أنا فخور إنى بشتغل مع واحد مجتهد وشاطر زيه».
واحتفالاً بالعامل المثالى، قرر «عبدالمنعم» تقديم كافة المشاريب فى هذا اليوم مجاناً احتفالاً به: «جمعت كل الناس اللى بتحبه، وكلهم قالوا فى حقه كلام كويس جداً، إنه شاطر وبيسمع كلامهم وبيعمل لهم اللى همّا عايزينه دايماً، ومش بيجادل مع أى حد، ده غير إنه على طول بيضحك فى وش الزبون، وده أهم حاجة أى صاحب قهوة بيدور عليها»، واستكمالاً لهذا الاحتفال، عمل «أحمد» فى هذا اليوم نصف عدد ساعات ورديته: «حبيت إنى أتصور معاه عشان نوثق اللحظة ويحتفظ بالصور عشان يفتكر اليوم اللى اتكرّم فيه».
تعليقات الفيسبوك