«أكلات بيتى بشكل فندقى»، شعار رفعه مجموعة من خريجى كليات الهندسة والألسن والاقتصاد والعلوم السياسية، ليعبّروا عن فكرتهم بإنشاء مشروع للأكلات البيتى بطريقة خارج الصندوق، لم يقفوا مكتوفى الأيدى فى انتظار وظيفة تناسب مؤهلاتهم العليا، ولجأوا إلى إنشاء مشروع يعينهم على إيجاد مصدر دخل مناسب.
محمد وحيد، مسئول بالفريق المكون من 7 شباب وفتيات: «بدل ما نقف فى طوابير البطالة، قرّرنا نعمل مشروع يخدم ستات البيوت، إنهم ياكلوا أكل فنادق ومطاعم فى البيت، وبأسعار مخفّضة على قد الإيد».
«إدى العيش لخبازه»، عبارة يؤمن بها فريق العمل المنفّذ للفكرة: «مفيش حد فينا بيعرف يعمل أكلات بطريقة بروفيشنال، جِبنا شيفات يساعدونا، واحنا مش عاوزين نكون تقليديين، زى أى حد بيفتح مشروع أكل بيتى»، لا يعتمد الفريق على المطبخ المصرى فقط، بل الأوروبى وبعض الأكلات من المطابخ العربية: «بنعمل أكثر الأكلات اللى بيكون عليها طلب فى المطاعم، وبنحاول نعرّب بعض الأكلات من المطابخ الأوروبية اللى تتناسب مع طبيعة المجتمع المصرى». ويغطى الفريق مناطق الرحاب والقاهرة الجديدة والسادس من أكتوبر: «بنحاول حالياً إننا نروح مناطق مختلفة زى المعادى والأحياء القريبة من الطريق الدائرى»، وحسب «محمد» فإن متوسط أسعار الوجبات يتراوح بين 50 و130 جنيهاً.
تعليقات الفيسبوك