لكونه من أصحاب الكافيهات الشهيرة فى منطقة أرض اللواء، لاحظ أحمد الهندى، تردد أعداد كبيرة من الأطفال بأعمار لم تتجاوز الـ 15 عاماً، على الكافيهات والمقاهى الشعبية، لتدخين الشيشة، فأطلق حملة لمنع استقبال الأطفال بدون بطاقة الرقم القومى أو بدون مرافق من الدرجة الأولى.
رغم أن «أحمد»، مُعرّض كثيراً لخسارة شريحة كبيرة من المترددين على الكافيه، لكنه لا يهتم سوى بالقضاء على هذه الظاهرة المنتشرة فى المنطقة: «الموضوع ابتدا يكبر وكل واحد ماطلعش من البيضة يجيب صحابه ويتنافسوا على شرب الشيشة، وفاكرينها شطارة»، خلال عمله فى هذا المجال طيلة 20 عاماً، كانت المقاهى والكافيهات للشباب وبالأخص كبار السن، الذين يتخذون من القهاوى مكاناً للتسلية بعد خروجهم على المعاش: «دلوقتى الناس الكبيرة بطلت تيجى زى الأول، والقهوة اتملت بالعيال وكل واحد فيهم يطلب شيشة».
اجتمع «أحمد» مع بعض أصحاب الكافيهات المجاورة له خلال الفترة الأخيرة، وتوصلوا جميعاً إلى هذا القرار: «ممنوع استقبال أى حد ماطلّعش بطاقة رقم قومى فى القهوة، ومفيش شيشة هتنزل لواحد أقل من 18 سنة، ومفيش طفل صغير هيلعب بلايستيشن لوحده من غير مرافق معاه، وده علشان مصلحة أولادنا، اللى بيسيبوا مذاكرتهم ويقعدوا على القهوة، ولو على الرزق ده بتاع ربنا هو مقسوم لينا طول ما إحنا ماشيين بما يرضى الله».
لاقت الحملة صدى واسعاً فى منطقة أرض اللواء، حيث استجاب لها معظم المقاهى والكافتيريات: «عدد الأطفال قل كتير جداً واللى بيقعد ما يقدرش يطلب شيشة نهائى»، ولكن يعيب «أحمد» على بعض أصحاب المقاهى الذين استغلوا الفرصة لاستقبال الأطفال بهدف زيادة ربح المقهى.
تعليقات الفيسبوك