«أحمد» بقدم واحدة داخل الملعب
يمارس رياضة كرة القدم بساق واحدة، يراوغ ويفكر ويسجل أهدافاً، أحمد السيد، 28 عاماً، من مركز سمالوط بمحافظة المنيا، أصيب بمرض السرطان فى العظام، فتغيرت حياته تماماً، لكنه بفضل قوة إرادته استطاع التغلب عليه وتجاوزه: «يوم 28 أكتوبر 2007 عرفت إصابتى بالسرطان، كانت صدمة بالنسبة لى لأنى كنت باعشق كرة القدم، وكان نفسى ألعب فى النادى الأهلى من صغرى».
لم يقف السرطان عقبة أمام «أحمد» لتحقيق حلمه: «كنت بالعب كورة مع إنى عارف إن ده خطر عليا، اتخبطت فى مفصل الركبة فاتكسر، غيّرته، اتكسر تانى، ماكانش فيه أى حل قدامى غير عملية البتر».
مشاعر مختلفة انتابته خلال تلك الفترة، كانت والدته هى الداعم ومصدر الأمان له: «أمى كانت الملاذ الآمن بالنسبة ليا، الله يرحمها من بعدها حسيت إن الدنيا اتقفلت فى وشى، كنت تعبان جداً بقاوح واثق إن دى حاجة بتاعة ربنا، كان أصحابى ووالدى وجوز أختى واقفين جنبى ومش بيفارقونى لحد ما تعافيت».
خلال تلك الفترة، تعرض «أحمد»، الذى يعمل فى مجال العلاقات العامة بإحدى شركات مستحضرات التجميل، لانتكاسة مرضية: «بعد فترة الورم رجع لى فى المعدة، وكنت ممنوع من أكل كتير، لكن الحمد لله دلوقتى تعافيت تماماً». حالياً يمارس رياضة كرة القدم فى مركز صانع الألعاب: «بقالى شهرين بالعب فى مركز صانع الألعاب مع فريق كلهم بعكاز، الكورة بترجع ليا حياتى وبترد روحى، باحس إنى طاير فى السماء، حياتى بعد المرض هى البداية الحقيقية عشان أبين قدراتى وموهبتى»، تعرض «أحمد» لبعض الصعوبات فى البداية أثناء اللعب بالعكاز: «اتكسر منى فى البداية أكتر من مرة، دلوقتى بجرى بيه حلو جداً».
تعليقات الفيسبوك