تعذيب الفئران باللاصق
اصطياد الفئران والحيوانات الزاحفة عن طريق اللاصق هو أسوأ أنواع التعذيب التى تتعرض لها الحيوانات، حسب ما أكده محبو الحيوانات الذين أعلنوا رفضهم لهذه الطريقة، لأنها تقوم بسلخ جلد الحيوان وهو حى، ووفقاً لما ذكرته دنيا محمد، التى أطلقت حملة لمنع اصطياد الفئران باللاصق، فإن الحملة ليست فى مصر فقط بل فى العالم، وهدفها التصدى لتعذيب وقتل الحيوانات: «فيه مليون طريقة تانية ممكن نتخلص بها من الفئران، بس اللاصق ده لأ، لأنه فيه مادة غراء قوية جداً بتلزق على جسم الفار وتشل قدرته على الحركة، وعشان تشيله من مكانه لازم يتسلخ من جلده، يا إما يتساب مكانه وهو بياكل فى جلده لحد ما يموت»، تحرص «دينا» على نشر حملتها على نطاق واسع، من خلال «فيس بوك»، والتواصل مع الحقوقيين والمهتمين بمجال الرفق بالحيوان لمناشدة المواطنين منع استخدام اللاصق: «الناس بتتعامل مع الزواحف اللى زى الفئران على إنها لازم تموت وكأنها بتنتقم منها، وده مش صح، الفئران هى كمان روح وبتتعذب وبتحس».
ومن ضمن مطالبات الحملة، حسب «دينا»، منع الشركات المنتجة من تصنيع هذا اللاصق، ومنع استخدام السم لقتلها، والعودة إلى استخدام المصيدة لإخراجها من المنازل: «الفئران من حقها إنها تعيش، وهى غير عاقل ومش قصدها تؤذى إنسان عشان هو يؤذيها، يا ريت لو الناس تستخدم المصيدة، وبعد كده تفتحها فى الشارع أو أى بيئة تانية زى المناطق الفاضية».
تعليقات الفيسبوك