المشاركون فى الدورة التدريبية
الأرباح المادية الكثيرة التى يجنيها الشباب من وراء نشر إنتاجهم عبر قنوات على موقع «يوتيوب» دفعت الكثير من أكاديميات الدورات التدريبية، إلى تقديم كورسات لتعليم الشباب كيفية تقديم فيديوهات على الموقع بشكل احترافى.
على إبراهيم، مدير ومؤسس شركة التدريب، وجد إقبالاً كبيراً من جانب الشباب على تلك الفكرة: «إحنا بنساعدهم فى الجزء الخاص بالتقنيات التكنولوجية والإلكترونية مش المحتوى، وده عشان يقدروا يقدموا فيديوهات بشكل احترافى».
يستمر الكورس مدة تتراوح بين 4 و6 أشهر: «الكورس بيكون مقسم لثلاثة أجزاء، جزء خاص بكيفية إنشاء صفحة على موقع يوتيوب وده مدته من 3 أسابيع لشهر كامل، والثانى خاص بالتصوير والمونتاج وده بيقعد مدة شهر ونص، والثالث خاص بالجانب الديجيتال والماركتينج ووسائل تكبير عدد المتابعين وده بيقعد لمدة شهر ونص».
وتتراوح أسعار الكورس للشهر الواحد بين 350 و400 جنيه: «إحنا كل تعاملاتنا مع طلاب الجامعات عشان كده بنحاول نحقق ليهم أحلامهم بأسعار بسيطة، عشان يقدروا يتعلموا ويستفيدوا».
وحسب «على» فإنه على الرغم من انجذاب الكثير من الشباب لهذه النوعية من العمل فإنه ما زال يفضل الكثيرون فكرة العمل الروتينى: «مش كل الناس حابة فكرة قنوات اليوتيوب، لكن اللى بيكون حابب المجال ده إحنا بنقدم ليه المساعدة من حيث تعليم فنيات التصوير المختلفة، واستخدام الكاميرا، بنعلمه إزاى يقدر يكبَّر القناة الخاصة بيه، طرق المونتاج، طريقة تفعيل القناة الخاصة بيه على جوجل عشان يقدر يحقق مكاسب مالية، بنوقفه على أول الطريق، وهو بقى يقدر يحقق شهرته بطريقته الخاصة».
ويروى «على» أن بعض «اليوتيوبرز» يقبلون على هذه الكورسات: «فيه كتير منهم بيعمل كده عشان يطور من نفسه لأنه حابب المجال».
تعليقات الفيسبوك