فى الوقت الذى يرفض فيه بعض الرجال مساعدة زوجاتهم فى تنظيف المنزل، ويجدون حرجاً شديداً فى القيام بالمهمة أمام مرأى ومسمع الآخرين، قرر مصلح حافظ، أحد سكان منطقة عين شمس، الاحتفال بعيد الأضحى بطريقته الخاصة، من خلال تنظيف أغلب شوارع المنطقة، باستخدام مقشة مصنوعة من جريد النخل.
يقوم «مصلح» بجمع القمامة الموجودة بالشوارع، ووضعها داخل صناديق القمامة الكبيرة، ثم يقوم بالكنس، وآخر مرحلة تكون رش الشوارع بالمياه، حتى تختفى الأتربة والغبار تماماً: «لقيت نفسى فاضى، وماكانش عاجبنى منظر الشوارع واحنا فى عيد، فقُلت أنضفها، وبقالى يومين شغال فى المنطقة بكنس قدام بيتنا، وفى الشوارع اللى جنبنا»، التجربة التى جذبت آخرين، وقرروا مساعدته، وآخرون اكتفوا بتنظيف شارعهم.
يملك «مصلح» وجهاً بشوشاً، وابتسامة مشرقة وهيئة وقورة مهندمة، تجعل معظم الجيران يتعاونون معه، ويستجيبون لدعوات التنظيف التى يطلقها أثناء تنقله وتجوله بين أكثر من شارع، فيقول: «مصلح بينضف الشارع قوموا ساعدوه ونضفوا».
لا يستغرق التنظيف وقتاً كبيراً من «مصلح»، ساعتين على الأكثر وينتهى من المهمة كاملة: «مش بجبر حد يساعدنى، أنا بنضف لوحدى لساعات، وفيه ناس كتر خيرها طبقت الفكرة، والمفروض نعمل كده على طول مش فى الأعياد بس، الواحد لو مانضّفش المكان اللى قاعد فيه مايستحقش يقعد فيه».
يحلم «مصلح» بتغيير ملامح المنطقة، ويرى أن موقفه الإيجابى بداية لتغييرها إلى الأفضل خلال الأيام المقبلة: «أنا عن نفسى هكرر التجربة، وأنضف الشوارع فى أقرب فرصة، ومش هسيب مكان قبيح، وأتمنى من جيرانى يحافظوا على الشوارع على الأقل لو مش هيقدروا ينضفوها».
تعليقات الفيسبوك