«مصطفى» مصاب بمتلازمة داون وأحد العارضين
فكرة غير تقليدية، الهدف منها دمج متحدى الإعاقة فى المجتمع، إحدى شركات الملابس الشهيرة قدمت عرض أزياء أبطاله من مصابى متلازمة داون ومرضى البهاق، لتوصيل رسالة قوية مفادها «كلنا واحد».
محمد على، مدير فروع الشركة، أوضح أن الشركة مهتمة بذوى الهمم وتسعى لدمجهم فى المجتمع بأفكار غير مألوفة: «الفكرة هدفها إننا نبرز قدراتهم، وفى نفس الوقت استخدمناها فى الدعاية»، تسلط الحملة الضوء على فكرة المساواة بحسب «محمد»: «كلنا واحد، نقدر نلبس كل حاجة، سواء كانت غالية أو رخيصة مش شرط تكون براند». ليس هذا فقط بل تهتم الشركة بتنظيم مسابقات لتوظيف ذوى القدرات فى فروع الشركة: «خلال الفترة الجاية هنعمل مسابقة نوظف بيها واحد فى كل فرع، لسه هنحط شروطها وآليتها، لكن أهم حاجة إن الشخص يكون متكلم».
مصطفى نوفل، 17 عاماً، أحد مصابى متلازمة داون، استطاع أن يحقق حلمه، ويصبح «موديل» فى عرض أزياء الشركة: «اليوم اللى سمعت فيه إنى هشارك فى العرض كان يوم تاريخى، فرحت فرحة كبيرة».
رحلة شاقة قام بها «مصطفى» برفقة أسرته من مدينة كفر الزيات التابعة لمحافظة الغربية وحتى القاهرة كان بطلها قوة الإرادة: «كنت فى رمضان والدنيا كانت صيام، بس كله يهون عشان وقفتى قدام الكاميرا لأول مرة، وزنى وطولى المناسبين هما دائماً اللى كانوا بيشجعونى إنى أبدأ فى مجال الموديل وأكون عارض أزياء لذوى القدرات الخاصة». يطمح «مصطفى» إلى أن يجد وظيفة ثابتة له فى مجال الموديل: «ده حلم حياتى، وأمى هتكون متطمنة عليّا لما اشتغل فى مجال بحبه».
تعليقات الفيسبوك