شباب الخير خلال عملهم فى معرض «أبورجيلة»
«على حب الخير اتجمعنا»، شعار مجموعة من الشباب، يجتمعون للعام الخامس على التوالى، لمساعدة الأهالى وإدخال الفرحة على قلوب الأطفال، بمنطقة «أبورجيلة»، التابعة لحى جسر السويس بالقاهرة، بتنظيم معرض لملابس العيد، وتوفيرها مجاناً أو بأسعار زهيدة، لا يتخطى سعر الواحدة منها جنيهين فقط. منة أونسى، من المشاركين فى الفكرة بالتطوع والجهود الذاتية، تقول: منذ اللحظة الأولى، التى أعلنت فيها عن بدء جمع الملابس للتجهيز للمعرض فوجئت بردود الفعل، التى رحبت بشكل كبير وأكدت استعدادها للمشاركة، مضيفة: «إحنا مجمعين أكثر من 30 شنطة مليانة لبس مختلف المقاسات والألوان والأشكال، العدد رهيب، أنا و7 زملائى فى الفريق بنقسم الشغل على بعض عشان نلحق نغطى كل الأسر اللى بتكون موجودة خلال اليوم».
تنظم المجموعة معرضها داخل أحد مساجد المنطقة، ويستمر لمدة يوم واحد: «فى أول اليوم بنفرز الهدوم كلها والمقاسات ونرصها، عشان نسهل على الناس عملية اختيار الملابس اللى تعجبهم». على مدار السنوات الخمس الماضية، توطدت العلاقة بين الشباب المتطوعين والأهالى: «بقى فيه بينا علاقة حلوة جداً، إحنا عرفنا المنطقة دى بالصدفة ومبسوطين إننا من ساعتها عمل الخير فيها ماتقطعش، بالعكس بيزيد كل سنة عن السنة اللى قبلها، فى الآخر بنجمع الأموال دى فى نهاية اليوم وبنشترى بيها ألعاب للأطفال، وبنوزعها عليهم بعد صلاة العيد نرسم الابتسامة على وجوههم».
«منة» وأصدقاؤها ينسقون مع أحد شباب المنطقة، ليحصر الحالات، التى تطلب المساعدة، ويرتبها وفقاً للأكثر احتياجاً: «إحنا معانا لحد دلوقتى 60 أسرة، الفرحة اللى بنشوفها فى عيون الأطفال دى متتوصفش وهى الدافع اللى بيخلينا نكمل».
تعليقات الفيسبوك