«عبدالمعز»
جسد مصاب بضمور فى العضلات لا يقوى إلا على تحريك أصابع كفَّيه، لم يستسلم صاحبه للجلوس على كرسى متحرك، وقرر أن يواصل حياته وينجح فى مجال معين يجذب إليه الأنظار.
سمير عبدالمعز تحوَّل من شاب قعيد إلى بطل سباحة حصل على 3 بطولات على مستوى الجمهورية، حيث يسبح مستلقياً على ظهره فوق سطح المياه، ويتحرك للأمام من خلال تحريك منطقة «الوسط» وأصابع الكفين.
يروى «عبدالمعز»، 40 عاماً، قصته مع مرض ضمور العضلات: «كنت بمشى بصعوبة لحد ما بقى عندى 26 سنة، بعدها الضمور تمكن من أطرافى الأربعة، ومن ساعتها وأنا باتحرك بالكرسى الكهربائى». داخل حمام سباحة طوله 25 متراً وعمقه 3 أمتار، يتلقى تدريبه بمساعدة مدربه: «وفقاً للقواعد الدولية مسموح للاعب بنزول المياه برفقة مدربه لحمايته، وبعد نحو 5 سنين لعب حققت 3 بطولات وراضى عن نفسى، ورغم إن ناس كتير حذرونى من السباحة لأنى كمان مش باقدر أحرَّك رقبتى لكن أنا أصرّيت على التحدى.. أنا باحب الحياة ومؤمن بإنه مفيش حاجة مستحيلة».
يدرس «عبدالمعز» أيضاً فى كلية التجارة، بجامعة القاهرة، بنظام التعليم المفتوح، ويعمل فى وزارة الشباب والرياضة، ولديه مهام كثيرة يفعلها يومياً: «شغل ودراسة وتمرين، طول اليوم باتحرك من هنا لهنا، بعد ما وصلت لآخر مرحلة فى المرض، ما بقاش قدامى غير إنى أعيش حياتى وأنبسط، أروح الشغل وأطلع منه على التمرين وباطلع رحلات مع زمايلى، وباغطس كمان فى إسكندرية، وعندى حلم إن شاء الله هاقدر أحققه، وهو الوصول للعالمية».
تعليقات الفيسبوك