كواليس تصوير الأغنية
التعب والاجتهاد وسهر الليالي، مسلمات في حياة طلبة الجامعة، يستسلمون لها منتظرين التخرج بفارغ الصبر، وعندها يتوجون انتهاء مرحلة الجامعة بتوثيقها لتصبح ذكرى.
طلبة الدفعة "55 طب طنطا" قرروا توثيق تخرجهم وذكرى الجامعة بتصوير فيديو يعبر عن معاناتهم في الجامعة، ولكن بطريقة مختلفة، فاختاروا لحن لأغنية شهيرة وألفوا كلمات جديدة ترصد رحلتهم، مستعينين بـ"مافيا" للفنان محمد رمضان.
على عكس ما توقعوا، فيديو التخرج الخاص بهم انتشر بشكل واسع، حتى وصل إلى محمد رمضان صاحب الأغنية الأصلية، وأعجب بها لدرجة أنه أعاد نشرها عبر مواقع التواصل معلقا "دفعة مفرفشة ودمها خفيف.. جامعة طنطا كلية الطب تمنياتي لكم بالنجاح والتوفيق.. أنا مافيا".
"الفكرة في الفيديو إنه يبقى ذكرى لينا مع بعض في نهاية الـ7 سنين، بغض النظر عن إن الفيديو هيتسمع في العموم ولا لا"، بهذه الكلمات عبر محمود النويهي، أحد أفراد الدفعة، ومصور الفيديو، عن هدف الفيديو لـ"الوطن".
ويضيف النويهي عن انتشار ونجاح الأغنية "الحقيقة متوقعناش النجاح والضجة دي، ومفكرناش في رد فعل الناس، كل اللي فكرنا فيه إنها أغنية خاصة بينا إحنا كدفعة مع بعض وفي إنها تنجح على مستوى الدفعة والكلية".
لم يفكر طلبة الدفعة "55 طب طنطا" في مصير الأغنية، سواء نجحت أم لا، لكنهم سعداء بالنجاح، ويتابع محمود النويهي قائلا: "مبسوطين إنه نجح، لكن لو العكس حصل مكناش هنتضايق، والفيديو اتعمل والتعب فيه مراحش على الفاضي، وعجب الدفعة وإدارة الكلية، وبكده اتحقق الهدف الأساسي منها خلاص".
سبب نجاح الأغنية يفسره النويهي بأن "يمكن يكون النجاح اللي حصل ده بسبب إن الناس فوجئت لأن فكرتهم عن طلبة طب إنهم ناس دحيحة بنضارة وملهمش في الأغاني والهزار والجو ده، ودي حاجة بردو كنا عايزين نوصلها من خلال الفيديو، إن إحنا ناس عاديين".
المعيار الأهم بالنسبة لطلبة "55 طب طنطا" هو كونها الأشهر وقت التصوير "اختيار الأغنية بيبقى ملوش أي علاقة بالأغنية الأصلية أكتر من إنها تبقى أغنية جديدة ومشهورة في وقت التصوير، ومفيش أي مشاعر تجاهها سواء بالحب أو الكره، والاختيار تم على أساس تناسق الكلمات مع اللحن وسهولة الغنا وإننا نفتكرها بعد كده، والاختيار كان بين 3 أو 4 أغاني مفيش علاقة بينهم تماما غير إنهم مشهورين وتريند وقتها".
تكرار الموضوع وتصوير أغنية جديدة، وخصوصا بعد نجاح الفيديو ليس هدفا لهم، فالنويهي بقول "إننا نعمل أغنية تانية ده حاجة مقررناهاش لسه، بس في الغالب هي بتبقى أغنية واحدة تتجمع فيها الدفعة كلها مع بعض قبل ما نتفرق، مش بنبقى عاملينه بهدف الشهرة أو إننا نعمل فيديوهات وخلاص، وده اللي حصل فعلا مع الفيديو، فبنسبة كبيرة مش هيبقى فيه فيديو تاني".
تعليقات الفيسبوك