​

اشتهر الإعلامي عمرو أديب، مقدم برنامج "الحكاية"، المذاع عبر فضائية "mbc مصر"، بجرأته وصراحته الشديدة في إبدائه الغيرة والإعجاب الشديد بأشخاص محددين، وقد يصل الأمر لحد "القر والحسد" العلني، باعتراف منه شخصيا، ورؤيته بأن "القر" لا يؤثر على هؤلاء الأشخاص، وكان آخر من أثار غيرة "أديب" وحسده هو محمد صلاح، لاعب المنتخب المصري الأول لكرة القدم، ونادي ليفربول الإنجليزي.

وبدأ أديب برنامجه قائلا: "من يومين إحدى الجرائد البريطانية الرياضية أفصحت عن راتب محمد صلاح، ويتقاضى محمد صلاح أسبوعيا 200 ألف جنيه إسترليني، كم أنت غنيًا يا صلاح، 200 ألف جنيه إسترليني، والإسترليني بـ22 وحاجة، ويتحدثون عن التوتال بالراتب بالإعلانات في السنة الواحدة 30 مليون جنيه إسترليني، وصلاح أعلى راتب في ليفربول دلوقتي".

وأضاف أديب: "ربنا يباركله هو يستحق أكثر لأن هذا الرجل بالكثير أمامه 6 أو 7 سنوات في الكرة، وهو ثاني أغلى قيمة للاعب بعد نيمار، اللي ييجي يقول شوفو عمرو أديب بياخد كام، حسيت قد إيه أنا فقير".

ولكن الشخص الذي يثير غيرة أديب، وحسده بشكل دائم هو الفنان عمرو دياب، وكان أشهر ما أثار الفكاهة لدى المصريين فيما يخص غيرة وحسرة وحسد أديب من عمرو دياب عندما شاهد الهضبة، وهو يؤدي تمرينات بصالة الجيم، بلياقة كبيرة، ويمارس تمارين قوية وصعبة، ويستعرض لياقته البدنية وقدراته الجسمانية.

وحينها قال "أديب" في برنامجه ذلك الوقت "كل يوم"، المذاع عبر  فضائية "ON E": "تصحى الصبح تفتح تويتر تلاقي عمرو دياب بينكد عليك رسمي.. تشعر إن إنت متوفي إكلينيكيا.. إن إنت أنتهيت ومالكشي لازمة وإن إنت قطع غيار وصيني.. أنا بقوم من السرير و4 بيقوموني والأستاذ عمرو دياب بيعمل حاجات يعجز عن فعلها أي حد في ريال مدريد.. صحة مفرطة.. والمفروض إننا سن واحد، بص السمانة.. بص الترابيس.. بص المجانص.. الأستاذ عمرو دياب بيقولنا ياصحة أوديكي فين.. الراجل صحته متفجرة.. يانهار أسود ومنيل.. واحد زيي ممكن يكمل إزاي في الحياه.. ليه يارب هو عمرو دياب وأنا عمرو أديب.. هو بس فرق الحروف.. لو كنت أنا عمرو دياب وهو عمرو أديب.. شعر وصحة وفلوس والبنات بتحبه، ورياضة غير طبيعية.. اللي بيعمله عمرو دياب ده يتحدى الحسد.. عمرو دياب بيقولي ياعمرو يا أديب موت بغيظك".

وأضاف أديب: "عمرو أخوك تعب.. أخوك معرفشي يعمل حركة من دول.. ليه ياعمرو كدا.. إيه الصحة اللي إنت فيها دي.. إيه التفاؤل والسعادة اللي إنت فيها دي".

ولم تكن تلك المرة الأولى التي لم يخجل ولم يتردد فيها عمرو أديب من إعلان الغيظ والحسد على "الهضبة" على الهواء، حيث تحدث عن الفنان عمرو دياب في برنامجه "القاهرة اليوم" على "أوربت".

وكانت تلك الواقعة بعد إصدار الفنان عمرو دياب ألبومه الجديد "عمرنا ما هيرجع زي زمان"، حيث قال: "عمرو دياب بقى عنده 26 سنة.. عمرو كل يوم بيصغر.. عمرو بيعمل أي شريط يحط فيه أي مزيكا بيخلص كله.. عمرو بيطلعله شعر وأنا شعري بيقع.. الراجل بيطلعله عضلات في وشه.. ده بيغيظني".

وفي فيديو آخر للإعلامي عمرو أديب، في حلقة من برنامج "كل يوم"، المذاع عبر فضائية "أون لايف"، وبعد دخول عمرو دياب موسوعة جينيس: "أنا عندي مع عمرو دياب خلاف جذري.. عمرو دياب بيصغر وصحته بتكون أحسن، وبيتفوق أكتر وبيفضل جان وناجح وعبقري.. مفيش حسد بيأثر فيك.. يعني الصحة اللهم صلي على النبي تمام.. أنا في حياتي عاوزة أبقى عمرو دياب وعقدتي أبقى عمرو دياب".

 ولم تسلم الفنانة فيفي عبده هي الأخرى من "قر" عمرو أديب، فقد حلت ضيفة ببرنامج "الحكاية" منذ عدة أيام، وقال لها عمرو أديب: "كلي كلي أنتي بتتعبي، ده الواحد لما بيرقص بيبقى عاوزله 10 أو 12 ساندوتش علشان يعوض الرقص، واحدة وصلت 45 سنة وبترقص في اليوم ساعة وبتعمل حفلات في رأس السنة، في اثنين في مصر ما بتأثرش فيهم العين، أنتي وعمرو دياب".

ولم يسلم كيان النادي الأهلي ومسيرته وبطولاته وتفوقه من "قر" عمرو أديب، وخصيصا كونه ينمتي لمشجعي نادي الزمالك.

ومن أشهر ما قاله في هذا الخصوص: "حتى لو النادي الأهلي راح لعب في الدوري الإنجليزي هايكسبوا بردوا.. ده النادي الأهلي.. أنا بس كل اللي أنا عاوزه افرحوا بهدوء.. خدوا الدوري بهدوء.. كل اللي بطلبه إنه بهدوء، خلوا عندكم إحساس بالناس التانية.. لأنه كدا هتتحسدوا وتخسروا.. وممكن الأهلي يتغلب الماتش الجاي لأنه دي بتبقى نفس، مبروك للنادي الأهلي.. هو أنا هفضل طول حياتي أبارك للنادي الأهلي".