​

أول قصة حب يعيشها الإنسان تظل ذكرى جميلة يحتفظ بها في طيات الذاكرة، مهما كانت ساذجة أو طفولية، ومهما تقدم في العمر أو حتى وجد حب آخر، ولا يوجد مناسبة أفضل من عيد الحب لكي يستذكر كل شخص قصة حبه الأول.

حكى كثير من الفنانين عن أول قصة حب عاشوها، ونستعرض في السطور التالية مجموعة من أبرز تلك الحكايات.

- محمد حماقي:

في برنامج "ذا فويس" الموسم الماضي، كان حماقي من ضمن المدربين الأربع في المسابقة، وخلال أولى حلقات البث المباشر، سأل عصام سرحان، أحد المتسابقين في فريق حماقي، مدربه عن أول حب في حياته.

وكانت إجابة حماقي :"كنت في ابتدائي، وعايز ألفت انتباهها، وكان هناك ولد معانا في المدرسة بيلعب كاراتية، فأنا قلت هي الخطة إني ألاعب الولد دا ماتش وأكسبه، وهو الولد دا بيلعب بطولات بقى على مستوى الجمهورية، فتأخد بالها وتحبني".

وأضاف "استنيته، وفي يوم كان عنده بطولة فهو جاي لابس البدلة جاهز، فروحت له وقلت له تلاعبني، قالي انت بتعرف تلعب؟ قلتله مش مستاهلة يعني أكون بعرف ألعب وهكسبك، راح عامل حركة كدا فروحت عامل زية، ومن بعدها  ما بقيتش بلحق أقف، وفي حاجة غريبة، بعد ما كنت المفروض أبقى بطل صعبت عليها فجابت نتيجة، فاكتشفت أن أنت لما تنضرب بتجيب نتيجة أحسن".

- محمد صبحي: 

عام 2016 قدم محمد صبحي برنامج اسمه "مفيش مشكلة خالص" عبر فضائية "سي بي سي"، وخلال إحدى الحلقات، حكى صبحي عن أول حب في حياته.

وقال :"أول حب في حياتي كان عندي 10 سنين، وكنت بتألم وأعيط بجد، كانت بنت الجيران في حتتنا في عابدين، والشارع كان عريض شوية فالعلاقة بينا بلكونة وبلكونة ومسافة كبيرة بينا، كل اللي بنقدر نعمله إننا نقف في البلكونة، أنا باصص لها وهي باصه لي، بس مفيش أي كلام ولا حوار ولا عارف صوتها ولا عارفة صوتي بس أنا معتبرها دي بتاعتي وبحبها".

واستطرد حديثه عن هذه العلاقة وكيف انتهت قائلا :"مرة كنت واقف في البلكونة، وكانوا بيحفروا حفرة عميقة في شارعنا، وحاطين لوح كدا عشان الناس تعدي عليه، ففوجئت بيها في البلكونة مبهورة براجل فران على كتفه طاولة عيش وسايق عجلة وعدى بمهارة من على اللوح، فأنا شعرت بالغيرة وحسيت الولد خطفها مني، فقولت لازم أعمل اللي الراجل دا عمله، ونزلت أجرت عجلة عشان أبهرها".

وتابع: "قعدت أقول يارب تكون واقفة في البلكونة وتشوفني، وروحت طاير بالعجلة وبعد متر واحد لاقيت نفسي نازل في الحفرة، وكل اللي كنت بفكر فيه وقتها إنها ماتشوفنيش، فببص بطرف عيني لاقيتها بتبصلي بشفقة فاتضيقت زيادة".

وختم "أهل الحتة طلعوني طبعا، ولاقيت العجلاتي جايلي، قالي إيه اللي معديك على لوح الخشب، وطاخ، قلم قاسي، وأنا كلت القلم من هنا وقلت ربنا ياخدها، وانتهت قصة الحب هنا وماشوفتهاش بعد كدا".

- محمود حميدة: 

عام 2017، استضافت الفنانة أنوشكا الفنان محمود حميدة في برنامجها "صالون أنوشكا، عبر فضتئية "دي إم سي"، ووقتها ذكر حميدة قصة أول حب في حياته.

قال محمود حميدة "أول حب في حياتي هي سهير مراتي أم بناتي، حبتها وأنا عندي 5 سنين، وهي أصغر مني بسنة، وأما كنا في طور المراهقة، انفصلنا بقى عن بعض، كل واحد راح في حتة، وبعدين رجعنا اتجوزنا".

- يسرا: 

أول قصة حب في حياة الفنانة يسرا، ذكرت تفاصيلها في برناج "أنا" مع الإعلامي عمرو الليثي، عبر فضائية "دريم".

وسردت تفاصيل القصة قائلة:"كنت في ابتدائي، وبحب ولد أكبر مني بـ3 سنين في المدرسة، ودا كان فرق كبير في السن، فأنا كدا كنت بالنسبة له طفلة فكان لا يمكن يبصلي، لكن جبته، واتقدم لوالدي ورفض".

- ريم البارودي: 

قالت الفنانة ريم البارودي، إن أول حب فى حياتها كان بفترة المراهقة عندما كانت طالبة بالمرحلة الإعدادية.

وأضافت، خلال حوارها مع الإعلامية راغدة شلهوب ببرنامج "قطعوا الرجالة"، والمذاع عبر قناتى "النهار والقاهرة والناس" خلال بث مشترك، كان حبا من طرف واحد، كنا بنركب أتوبيس المدرسة أنا وأختي وهو بيعدي بعربيته، وأنا كنت في إعدادي وهو أكبر بكتير".

وتابعت أنها لم تعش أي قصة حب في حياتها، و"موضوع زي دا مش بيضايقني، لأن الحب مش لازم يكون بين الست والراجل، لأن الشغل والأسرة فيهم حب كتير".

- جنات: 

قالت الفنانة جنات، إنها خاضت أقوى قصة حب في العالم بالنسبة لطفلة، مضيفة: "أول سنة حضانة حبيت طفل، حب عمري ما هنساه طبعا، لدرجة أنه خرملي عيني بالقلم الرصاص ومقولتش لحد".

وأضافت جنات، خلال حوارها في برنامج "ضربة حظ "، مع الإعلامية رزان مغربي، على قناة "الحياة": "من حبي وخوفي عليه مقولتش لحد، روحت البيت واللي ييجي يكلمني أبص الناحية التانية عشان محدش يعرف"،وتابعت: "كان بيلعب معايا مكنش قصده، ماما اللي عرفت".

- سليمان عيد: 

ذكر الفنان سليمان عيد، إن أول قصة حب في حياته عاشها في الصف الأول الإعدادي والفتاة التي كان يحبها كانت في الصف الخامس الابتدائي، مضيفا أنها كانت تمتاز بالجمال وعندما كانت تذهب إلى المدرسة كل يوم تنظر إليه وتبتسم فيبادلها الابتسام.

وأضاف "عيد" خلال حوارة مع الفنان أشرف عبد الباقي في برنامج "عيش الليلة" على قناة "دي ام سي" أنه عندما تحدث عن الزواج في منزله فوجيء بغضب أهله "جواز إيه إنت عبيط" "وأنا مش قادر أنساها لحد دلوقتي".