فى ظاهرها فكاهية، وبباطنها تكمن معانٍ جادة، عمد الدكتور محمد كمال، أستاذ الفلسفة فى جامعة كفرالشيخ، على تقديم 40 نصيحة للطلاب الجدد على المرحلة الجامعية.
من وجهة نظر أستاذ جامعى يشاهد الحيل الطلابية، للفلت الأنظار أوعدم فهمهم الجيد لتلك المرحلة، بنشر "بوست" سنوى للدفعات الجديدة، للتعرف على الجامعة، والبعد عن ما يروه فى الأفلام، لانه غير حقيقى، يجرى تغييره كل عام، عام، وفق أحدث المستجدات.
بهدذ الكلمات، علّق الدكتور محمد كمال، لـ"الوطن"، على فكرته، التى يقصد كتابتها بطريقة فكاهية "لأنها الطريقة التى تجذب الطلاب فى هذا السن للقراءة، وتجعلهم يحفظون النصائح ويتذكرونها حين يقوم أحدهم بشئ من المكتوب فى الموضوع.
وذكر الدكتور 40 قاعدة دراسية، لطلبة الجامعة المستجدين، على النحو التالى:
1ـ بلاش تعمل ناصح على الدكتور، لأن وأنت رايح تعمل ناصح، كانوا الدكاترة راجعين من المرة الـ50 بعد الـ1000، فبلاش تفقع مرارتنا لأنك واحد من آلاف أو 10 الآلاف مروا علينا.
2- الجامعة، لا هى فرح ولا ماتش كورة، يعنى المناظر اللى بنشوفها بتاعة المكياج مغرق وشك، وواخدة 2 كيلو "لاكيه" ده فى فرح شيماء صاحبتك مش فى الكلية، وبلاش الضحكة الرقيعة، اللى بنسمعها من آخر دور، وأنت بلاش البناطيل الساقطة والمقطعة.
3- أنت جاى الجامعة، المفروض عشان تحضر المحاضرات مش عايز تحضر لا يكلف الله نفسا إلا وسعها بس متزعلش لما النتيجة تطلع وعامة فى كل الأحوال هتتخرج 99% هتشتغل مندوب مبيعات أو كول سنتر يعنى ممكن تشتغلهم وأنت طالب بردو تبقى تخلص مع أولادك الكلية.
4- يا ابنى أنت جاى الجامعة عشان تذاكر، وتنجح، مش عشان تعلق فتكات رمش العين، ولا عشان هى تصطاد عريس، وشغل الأفلام العربى، بتاع عبدالحليم ونادية لطفى، وأنك تخبط فيها والكتب اللى هى حضناها تقع من إيديها وتلموا الحاجة سوا والنظرات والعيون والكلام ده مش بيحصل لو عملتها غالبا هنسمع صوت القلم على وشك واحنا فى مكاتبنا.
5- اوعى تصدق الأفلام العربى، اللى بيستخف دمه، ونظام الباشا تلميذ ده ممكن الدكتور يخليه يحزن كتير أوى، وبرضه مش هتلاقى تامر حسنى قاعد بالجيتار على سلم الكلية والبنات بتسبل له.
6- عيل يطرقع بصوابعه، ويقولى عايز ادخل الحمام يا مستر، هعصره اطلع منه طلبة "كى جى 1".
7- اسمها محاضرة مش حصة ولا درس.
8- بلاش تعمل ناصح على الدكتور.
9- الجرس يعنى فيه حريقة، مش فسحة، ده لو فيه جرس إنذار للحريق إصلا فى كليتك.
10- اسمه دكتور أو دكتورة مش "مستر أو مس" أو "أبلة وأستاذ".
11- الشباب والله سور الجامعة، ما سور المدرسة، يعنى مفيش نط من عليه مش عايز تحضر المحاضرة متحضرش وخلصت.
12- اللى بيقعدوا فى آخر "بنج" اوعوا تفتكروا إنى مش شايفكم، والله شايفك خصوصا أنت يا اللى بتلعب "شطرنج مغناطيس"، مع زميلك اللى جنبك وإنتى ياللى بتاكلى فول وطعمية.
13- آه بالمرة بلاش دخول على "الفيس" فى المحاضرة، لأن معظم الدكاترة عندهم "فيس بوك"، وشوية وتبعتوا لهم، وممكن يقبلوا الإضافة، وبصة واحدة فى "الفيس" هيعرف إنكم كلكم عليه وإنتم فى المحاضرة.
14- إحنا فى جامعة مش فى سينما، يعنى الخناقات اللى بتحصل عشان الحجز عيب، وممكن تنطردوا كلكم من المدرج، عشان تحجزوا مكان على باب المكتب وأنتم بتاخدوا الكارنيهات.
15- افتكر تانى إنى قلت لك بلاش تعمل ناصح على الدكتور.
16- احنا فى جامعة مش جامع، يعنى حسب جامعتك لو الصبيان فى "بنجات" والبنات فى "بنجات" التزم بالنظام، ولو قاعدين مختلط، يبقى برضه متعلقش، مش عاجبك شوف مكان فاضى واقعد فيه.
17- لو قعدت جنب بنت، دى أختك، بلاش نظام الأتوبيسات إياه، عشان ممكن تقول كلمة تزعلك، وتلاقى كل المدرج بيخدم معاك، وهايبقى شكلك وحش جدا.
18- بلاش شغل التسبيل لزميلتك طول المحاضرة، ركز فى المحاضرة عشان ماتتسئلش سؤال، وأنت سرحان ويبقى شكلك بايخ.. الأهم من كل ده استحمى والنبى عشان ريحة المدرج مش أكتر.
19- على الأقل حسسنى إنك جاى تكتب أى كلمتين، يعنى على الأقل معاك أجندة وقلم، تكتب بيه والأجندة لها فايدة تانية، إنك هتقعد عليها بدل ما تقعد على الأرض وهدومك تتوسخ وأنت قاعد عند "الكافيتريا"، ولا فى "الجنينة"، إنما جاى "طرزان" عشان الأجندة تقيلة على إيدك هتزعل.
20- تفضل مكبر للمحاضرات طول السنة خد بالك مفيش ملازم تنفع معايا ولو قلت فى الامتحان ماخدناش الموضوع ده هيتعمل عليك أحلى حفلة وكل اللجنة هتضحك عليك لما تكتشف إنى دكتور المادة اللى أنت بتشتكى له أن دكتور المادة مشرحش الموضوع وإنت مش عارفنى أصلا.
21- كل فى بيتكم وادخل الحمام فى بيتكم، إحنا "الدكاترة" مش بنلاقى حمامات نضيفة أنت اللى هتلاقى أبقى قابلني.
21- عيل ولا بنت ييجوا يقولوا لى عايزين نأخد درس يا "مستر"، ولا حضرتك بتدى فى "سنتر" إيه، ممكن أعلقهم فى المروحة بتاعة المدرج الدروس دى كانت أيام ثانوى هنا الكتاب والمحاضرة والمكتبة تقرأ فيها مراجع يا بطل.
22- نظام إنت أحسن دكتور فى التاريخ، وإنت مفيش زيك، "مبناكلش منه"، وبتقل فى نظرى جدًا ومر علينا من العينات دى كتير وهيتطبق عليك النظام زيك زى غيرك.
23- بلاش نظام تمسك الأجندة، وكتابة من أول المحاضرة لآخرها، كل كلمة بتحصل، وكح الدكتور، وقال الدكتور للى جنبى إنت نايم ليه، شيل إيدك من جيب اللى جنبك شغل الكاتب المصرى، ده بيخليك متعرفش تركز فى اللى الدكتور بيشرحه.
24- بلاش نظام التسجيل، إنت مش جاى حفلة عمرو دياب، ولا تامر حسنى، ولا إنت مخبر جاى تسجل للدكتور عشان تروح تسلم تقرير عنه.
25- اوعى تنام فى المحاضرة، عايز تنام روح ومتحضرش المحاضرة أحسن، عشان هضطر اقلق سيادتك واصحيك لأن شخيرك جايب المبنى التاني.
26- العيال اللى بتشرب ممنوعات، وبتعمل حاجات خليعة، والله لأرش عليكم مياه وعملتها قبل كدة، فمفيش حد يعمل كده، عيب انتم طلبة جامعة ومحترمين وكبار.
27- لو بنت وقاعدة فى المدينة افتكرى دايما أهلك، وإنك جاية تتعلمى أول ناس هتتكلم عنك بطريقة وحشة الشباب اللى هتمشى معاهم ويرسموا عليكى دور الحب.
28- افتكر تانى، اوعى تعمل ناصح على الدكتور.
29- لو فيه أنشطة فى كليتك شارك وعيش الجامعة لأن مش هيتكرر تانى بس إياك تأثر على دراستك وإلا هتتفضح لما تخلص وهم عاملين يافطة لتهنئتك بالحصول على الليسانس بعد كفاح 10 سنين.
30- رضا شؤون الطلبة من رضا أمك وأبوك، اوعى تتخانق معاهم مهما حصل لأنهم برضه هيطلعوا صح وإنت الغلطان وهيطلع عينك.
31- العيال بتوع سنة أولى بلاش شغل الثانوى بالتخبيط على باب المدرج ويطلعوا جري.. زميلك اللى كان واقف هيفضحك ويقول على اسمك أول ما هقول له هسقطك.
32- البنات بلاش الكعب العالى، خصوصًا اللى فى كعبها حديدة وتمشى بنظام تيك تاك وتخلى المدرج كله يبص وتشتتى لى المحاضرة، هتزعلى قوى لما يضحكوا عليكى وبلاش طرقعة اللبان، شكلك بيبقى زبالة وبلاش تصوير سيلفى "بوز المعزة" فى الكلية الناس بتضحك عليكى يا هبلة منك لها.
33- اللى بيدخلوا المدرج والمحاضرة شغالة لو الدكتور سمح بالدخول ادخل من الباب الخلفى واقعد فى أقرب مكان مش لازم تقعد جنب صاحبك وتقوم "البنج" كله.
34- بلاش شغل النط من فوق "البنجات" والكتابة عليها بالمسامير والقلوب، وأحمد ومنى حتى آخر العمر، لأن أنت بتحفر فى "البنج" ومنى بتذاكر ولما تسقط مش هتعبرك يا فاشل يا فاشل.
35- العيال اللى بيجوا من الكليات التانية وفاكرين آداب الكعب العالى والكلام القديم موت ده، وبنبقى مش عارفين نمشى منهم هنرش مية ونكهربها.
36- بلاش القعدة على السلالم وتقفلوها وكل اللى طالع واللى نازل لازم يستأذن حضراتكم عيب.
37- الموبايلات الصينى، اللى بتشغلوها على أغانى، وكأنكم فى فرح ومشغلين أوكا وأروتيجا، وتشوش على المحاضرات أبقى خليهم ينفعوك لما "تتقفش".
38- بلاش نظام كل شوية ترفع إيدك ونسأل فى حاجة اتشرحت، أو عن حاجة لم تشرح، عشان تستعرض عضلاتك وتظهر للدكاترة وكدة، بتتكشف بسرعة والكل بيزهق منك.
39- هتقولى دول 39 وأنت كاتب إنهم 40، هقولك جملة واحدة بلاش تعمل ناصح على الدكتور.
تعليقات الفيسبوك