أحد رواد الكافيه بالبطانية
حتى لا يحول الشتاء دون خروج محبى ارتياد الكافيهات، ابتكر كافيه فى المعادى طريقة لجذب زبائنه من الشباب حتى فى الطقس شديد البرودة، وهى وضع بطانية على كل ترابيزة، بحيث يمكن لزائريه الالتحاف بها تجنّباً لبرودة الشتاء التى تُعكّر صفو الخروجات الليلية.
«بيحطوا البطانية عليهم وقدامهم التليفزيون، يعنى كأنهم قاعدين فى البيت بالظبط، ويقدروا يقعدوا وقت أطول علشان هيكون متدفيين».. حسب محمد شاهر، صاحب الكافيه، الذى تم افتتاحه فى بداية العام الجديد، تزامناً مع بداية انخفاض درجات الحرارة، لذلك يُخصّص الكافيه بطاطين لزواره، سواء كانوا فى الداخل، أو فى المساحة الخارجية له: «فيه ناس كتير بتبقى عايزة تنزل وتخرج وتقابل أصحابها والساقعة بتكسلهم، علشان كده جبنا لهم بطاطين ومالهمش حجة فى الخروج بقى».
يحرص «محمد» على أن تكون البطاطين المقدمة للزوار، من الخامة الجيّدة وجودتها عالية حتى يشعر الزائر بالدفء، بمجرد أن يضعها فوقه: «كل واحد بياخد بطانية، لو عايزين يقعدوا جنب بعض على الكنب ويتغطوا مع بعض هما اللى بيطلبوا ده»، مؤكداً أن البنات الأكثر استخداماً لها، فهن يشعرن بالبرد أكثر: «الناس بقت تيجى تسأل على البطانية قبل ما تقعد من كتر ما عجبتهم الفكرة، بيقولوا لنا إحنا حاسين بجو البيت، خصوصاً بقى لما يطلبوا حمص الشام وتكمل التدفئة». ورغم توزيع البطاطين، إلا أن الكافيه يقوم بتثبت مدافئ تعمل بالغاز أمام المناضد، حتى تتناسب درجة حرارة المكان مع المتردّدين عليه: «كده الخروجة كملت والناس مالهاش حجة».
تعليقات الفيسبوك