أثرى الغناء العربي، بألحان تميزت بالدفء والعذوبة، واستطاع "سيد مكاوي" أن تظل ألحانه خالدة رغم غيابه عن عالمنا منذ عدة أعوام، كما قدم بعض الأغاني التي نجح بها كثيرا لينتظره الجمهور من حين لآخر بأغنية جديدة خاصة به، ليتحدث عن قلة إنتاجه في هذا الصدد قائلا: "الأساس عندي التلحين، ولما أغني بيبقى صدفة، ونزولا لرغبة الناس وعلشان خاطرهم بس".
اللحن مصدر سعادة بالنسبة له، ليقول عن ذلك "اتعلمت من اللحن التعبير عن اللي جوايا، وأنا مدين للناس بتعلم الموسيقى، ومن كتر ما بحب الناس قدرت أفهم بيحبوا ويجتمعوا على ايه، وربنا بيوفقني إني أعمل اللحن اللي يصادف الحب في قلب كل إنسان".
وشدد مكاوي، في حوار له مع الإعلامي حكمت وهبي، على ضرورة عمل الفنان بضمير لكي ينجح "لازم يبقى صادق مع نفسه مايعملش الشغل وخلاص"، لافتا إلى أنه لحن لجميع المطربين عدا عبدالحليم حافظ "علشان فيه ملحنين متعاقدين معاه ومرتبط بيهم، ولو كنت اشتغلت معاه كنت هوقف حال ملحن من اللي بيشتغلوا معاه لمدة سنة وهو طلب مني كذا مرة بس أنا رفضت".
وعن طريقة تلحينه قال مكاوي: "بستحضر المطربة في خيالي والناس أيضا، والموسيقى لازم تلمس القلب، وبخلي شخصية المطربة موجودة في الأغنية أكتر من الترزي وهو بيفصل فستان، ماينفعش اتجنى على المطرب و لازم أديه الشكل بتاعه، لانه كل فنان وملحن أيضا لازم يبقى ليه ملامح".
وعن تقييمه لنفسه قال مكاوي "أنا الحمدلله ليا شكل غير حبايبي الملحنين، ولو كنت غنيت من زمان كنت بقيت كويس، لكني غنيت متأخر"، مشيرا إلى أن المطربات الأكثر حفظا لألحان سيد مكاوي هن ليلى مراد ونجاة الصغيرة وميادة ووردة وهدى سطان، وأم كلثوم ست الكل، مضيفا "لسه ماجاش حد زيها، وربنا يبعتلنا حد زيها، وياريت مطربينا يقدروا يوصلوا ليها".
تعليقات الفيسبوك