تداول عددٌ من مستخدمي مواقع التواصل، فيديو نادر لحديث أُجري بين المطربة الراحلة أم كلثوم، والكاتب الراحل إحسان عبد القدوس، حيث لعبت أم كلثوم دور المحاورة، ووجهت عددًا من الأسئلة للكاتب الراحل، حول الفرق بين الجيل القديم والجيل الجديد.

"الوطن" تستعرض الحوار الذي جاء على النحو التالي نص الحوار:

أم كلثوم: "هسألك أسئلة جامدة"

إحسان عبد القدوس: "الجامد منك حلو"

أم كلثوم: "انت ليه متحمس لكل حاجة جديدة؟ وإيه رأيك في الجيل الجديد؟".

إحسان عبد القدوس: "مش بفرق بينهم بشكل ثابت، العمر مش هو اللي بيقيم الناس، في الجيل القديم في ناس كويسين وناس منجحوش، والجيل الجديد كده برضه".

وأضاف: "احنا بنغلط لما بنحكم على الجيل الجديد بظروفنا، فبنصدر أحكام ممكن تكون مش صحيحة، لإننا مش بنراعي ظروفهم، وعايزينهم يعملوا زينا".

أم كلثوم: "أنا بشوف الجيل الجديد واعي أكتر من الجيل القديم، الحياة متاحة له بشكل أكبر، جيل صريح ممكن الواحد فيهم يشرب السيجارة وميخبيش على أبوه في البيت، وده بالنسبة لي أفضل لإنه مش بيكذب .. رأيك ايه؟".

إحسان عبد القدوس: "لأ، الجيل الجديد فيه شباب واعي وشباب بيتناول الأمور بسطحية زي الجيل القديم، ممكن تلاقي راجل عنده 60 سنة بيفكر أفضل من شاب عنده 25 سنة، لكن الجيل اللي بعد الجيل الجديد، هيلاقي نفسه أكثر تطورًا".

أم كلثوم: "أنا بفضل الجيل الجديد، لإنه واعي وصريح ومتفتح .. حاجة تانية غير الجيل القديم".

إحسان عبد القدوس: "وأنا صغير كنت متربي في بيت جدي أزهري متدين، لو بنت صغيرة بصت من الشباك يديني العصاية ومكنش بيضربها هو عشان يربوني على تقاليدهم، مبقتش موافق على الكلام ده وجيلنا كله رفضه".