تحية كاريوكا وفيفي عبده
في لقاء قديم عام 1999 اجتمع أشهر الراقصات سويا "تحية كاريوكا، فيفي عبده، ونجوى فؤاد" في برنامج مع الإعلامية هالة سرحان.
وقالت تحية كاريوكا في بداية اللقاء "والله لولا فيفي ماكونتش أنزل من بيتنا لو جالي مين، أنا فيفي قالت لي عشان خاطري يا ماما وأنا بحبها، هي بنتي فعلا، لو عندي بنت محبهاش أكتر منها".
وتتذكر كاريوكا حينها عن أول يوم رأت فيها فيفي عبده، كانت تبلغ الأخيرة نحو 16 عامًا، في أثناء رقصها في محل زوج فيفي: "كان معايا مها صبري وجوزها، قولتلهم اسمها إيه؟ قالولي فيفي، قولتلهم من هنا لـ 10 سنين هتشوفوا البنت دي هتبقى إيه".
"ندهتلها، قولتلها بطلي الكباريهات دي والقرف ده عايزة تشتغلي واسمك يلمع اشتغلي في محل مفيهوش الكحول خالص، وفعلا عملت كده".. وتصف كاريوكا حبها الشديد لفيفي عبده قائلة: "يمكن مفيش صداقة ولا حب قد اللي أنا بحبه لفيفي"، فتقاطعها نجوى حديثها: "كده أنا أزعل واتقمص"، فترد كاريوكا "إنتي بحبك 2 كيلو هي 100 كيلو".
وتحدثن جميعا بعد طرح سرحان لهم سؤالا عن فكرة الراقصة التي تخطف الزوج من زوجته ليتزوجها، لترد كاريوكا "مفيش راقصة عملت كده"، وعلى جانب آخر تقول فيفي إن جميع المهن يحدث فيها ذلك، لماذا يقتصر الأمر على الراقصة؟ فهناك السكرتيرة والصديقة وغيرهم.
وتستكمل كاريوكا الحديث بقولها: "هقولك حاجة دمها خفيف، أنا عندي صاحب جواهرجي، كل ما أخرج أروح لجورج أقوله أنا رايحة حفلة وأتصيغ ولا مرات ملياردير"، فينخدع من يشاهدها ويعتقدون أن زوجها هو من يشتري لها كل هذه المجوهرات: "لدرجة إن جوزي اتلهف مني عشان المجوهرات، في 60 داهية، وهما مش عارفين إن المجوهرات دي مش بتاعتي".
ما يجعل فيفي تقول إن دائما المظاهر تخدع الناس: "والناس مبقاش عندها قيم ولا مبادئ".
"ليه الفشل في الزواج مرات عديدة فيفي 5 مرات نجوى 4 تقريبا وحضرتك" كان هذا سؤال هالة سرحان لترد كاريوكا "مبعدش، مش عداهم"، فيضج الجمهور بالضحك وتستكمل إجابتها "فشل مني أو منه، أنا إيش عرفني؟".
تعليقات الفيسبوك