نصائح تجعلك سعيد
دائما ما يبحث الكثير في حياته عن السعادة، ورغم أن هناك بعض الأشياء التي من الممكن الوصول من خلالها إلى السعادة لكن يتجاهلها البعض.
وفيما يلي 9 نصائح لتكون سعيدا، يقدمها مصطفى خليفة استشاري تطوير الأعمال:
1. قول شكرا
لما تقول للناس شكرا على حاجة كويسة عملوها ده بينعكس عليك إنك تبقى سعيد، لأنها بتعمل ذاكرة كويسة خصوصا لما بتشوف رد فعل الشخص اللي قدامك لما بتشكره، متنساش تشكر الناس حتى لو على الحاجات البسيطة.
2. حل كل مشكلة لوحدها
كلنا بنواجه مشاكل كتير، مهم جدا أني افكر في كل مشكلة لوحدها، لأن العقل مبيقدرش يحل أكتر من مشكلة في نفس الوقت، فلو حاولت تحطهم كلهم قدامك ده هيتسبب في الاكتئاب، فكر في مشكلة مشكلة لحد لما تحلها، وبعد كده فكر في اللي بعدها.
3. ماتكتمش حاجة جواك
مهم جدا أنك تتكلم عن أي حاجة مضايقاك ومتشيلش جواك، ممكن تتكلم مع صديق عن حاجة ضايقتك حتى لو مفيش حل واضح دلوقتي بس ده هيساعدك تطلع الضغط من جواك وماتشعرش بخنقه.
4. حيي نفسك وكافئها
مهم جدا لما تعمل حاجة كويسة أنك تكافئ نفسك لأن ده بيساعدك أنك تتحفز وتكمل، ممكن تكون المكافأة بسيطة إنك تاكل أكلة حلوة أو تدخل سينما، وممكن تجيب حاجة أو تعمل حاجة كان نفسك فيها، ممكن كمان تربط المكافأه بإنجاز حاجة معينة عشان تشجع نفسك أكتر.
5. اتعلم
لازم تحاول دايما أنك تتعلم حاجة جديدة، واسأل نفسك كل فترة إيه اللي اتعلمته، تعلم مهارات جديدة ومعرفة معلومات جديدة بيخليك تحس أنك بتتقدم وبتتحسن، إنك تقول لنفسك إيه اللي اتعلمته هيديك إحساس بالرضا.
6. مارس الرياضة
حتى لو بشكل بسيط، بس ممارسة الرياضة بتحسن المزاج بشكل كبير وبيدي شعور بالراحة والنشاط، وطبعا لو فيه رياضة معينة بتحبها يفضل تواظب عليها.
7. نام كويس
مهم جدا تاخد راحة بشكل صحيح وخصوصا بعد الأيام المجهدة، أنك تاخد نصيب كويس من النوم بيساعدك تكمل الأسبوع بشكل أفضل، حاول متبتديش الأسبوع وأنت مش نايم كويس من إجازة نهاية الأسبوع.
8. فكر في الحاجات اللي تسعدك واستناها
مهم أوي إنك تسعد نفسك بانتظار الحاجات الكويسة، زي مثلا إنك تسافر أو هتخرج، تابع ده واستناه واستعد نفسيا لأن ده هيساعدك تحس بسعادة انتظار الأشياء الجميلة.
9. تصالح مع أخطائك
كلنا بنغلط ولازم نعترف بده، فمتحاسبش نفسك زيادة عن اللزوم، مهم جدا نفكر في أخطائنا عشان نتعلم منها، ولكن بمجرد ماتعرف إيه سبب خطأك وإزاي ميحصلش تاني تصالح مع نفسك وسامحها، كلنا بنغلط بس الأهم أننا منكررش أخطاءنا.
تعليقات الفيسبوك