صورة أرشيفية
يواجه الجميع مشاكل كثيرة سواء في حياتهم الخاصة أو في العمل، ما يجعلهم يحاولون حلها عن طريق قرارات فردية، أو بشكل جماعي بالاستعانة بالآخرين للوصول لشيء مناسب.
ويقدم مصطفى خليفة استشاري تطوير الأعمال نصائح بكيفية تحديد المشاكل وفهمها والوصول لأفضل الحلول، واتخاذ القرارات المناسبة في 10 خطوات كما يلي:
- لا بد من تحديد المشكلة من خلال معرفتها بالتفصيل، ولازم نعرف بتأثر علينا في إيه وحجمها قد إيه عشان نبقى منطقيين في الحل.
- تجميع كل المعلومات المتاحة عن المشكلة ووضعها أمام الناس كلها، مهم جدا نفرق ما بين المعلومات والحقائق وبين الآراء، هنا عايزين الحقائق بس وتبقى متاحة لكل الناس اللي بتشارك في الحل واتخاذ القرار، عشان نبقى كلنا على نفس الأرضية.
- نبدأ نفكر في الحلول وإيه البدائل اللي موجودة، ومهم جدا لما نفكر في البدائل نخلي الناس تتكلم بحرية ومنحكمش على أي رأي إذا كان صح أو خطأ، ينفع أو مينفعش، مش وقته دلوقتي، أهم حاجه اكتب كل الحلول والبدائل حتى لو كانت مش منطقية أو صعبة، لأنه ممكن من الفكرة دي تطلع فكرة تانية ممكن تطبق، طلع أفكار كتير المهم كمية الأفكار مش جودتها في المرحلة دي.
- بعد كده نبدأ في تحديد أي عوائق أو قيود للحل، على سبيل المثال لو فيه إطار زمني لازم نخلص فيه المشكلة أو في ميزانية متاحة مينفعش أني أعديها، وبناء على القيود دي أبتدي أستثني الأفكار غير النافعة.
- بعد كده بنشتغل على تقييم كل فكرة من اللي ممكن يطبقوا، وهنا لازم نكتب مميزات وعيوب كل فكرة، ولازم أمشي بترتيب، أقول الفكرة، أطلب من كل الناس تكتب مميزاتها وبعد كده أخلي كل الناس تكتب عيوبها، واتنقل للفكره التانية وهكذا، الخطوة دي مهمة لأنها بتخلي الأفكار تنفصل عن اللي قالها، ويبقى تقييم الفكرة فعلا على أساس جودة الفكره مش صاحبها، ومع تجربة الموضوع ده هتلاقي أحسن واحد يقول مميزات اللي كان رافض الفكرة، وأحسن واحد يطلع عيوب حقيقية هو صاحب الفكرة أو المتحيز لها لأن نظرتهم بتبقى عن فهم وعدم اعتراض لمجرد الاعتراض أو مدح لمجرد المدح.
- بعد ما كتبنا مميزات وعيوب كل نقطة، اعرض الموضوع للرأي النهائي، ممكن هنا نعمل تصويت أو نحط تقييم لكل فكرة بحيث إننا نشوف إيه أفضل حل، مهم أوي معرفة رأي الناس وشعورهم لأن الخبرة بتبقى عامل في شعور الناس إذا كان الحل ده مناسب ولا لأ.
- نتفق على الحل المقترح ونشوف عيوبه تاني، نفهم إن مفيش حل سحري بدون عيوب، إحنا قبلناه لأنه أفضل من غيره مش الأفضل على الإطلاق، ونبتدي نشوف إزاي هنتجنب العيوب دي أو نقلل من تأثيرها علينا، وارد جدا في المرحلة دي أني آخد جزء من حل تاني لو أمكن وأضيفه على الحل اللي اخترته بحيث إني أطلع أفضل حل ممكن عن طريق مزج الأفكار المختلفة.
- بعد تحديد الحل نبتدي نحدد الخطوات اللي هنطبق بها الحل ده عشان نوصل لأفضل نتائج ممكنة، ونوزع المهام أو الخطوات دي على فريق العمل بحيث ضمان أن لكل خطوة مسؤول، مفيش مانع أكتر من حد يشارك في نفس المهمة بس لازم يكون فيه مسؤول.
- تلخيص ما قيل مع جميع أعضاء الفريق، المشكلة وحجمها والمعلومات المتاحة عنها، إيه الحلول المقترحة وإيه الحل اللي اتفقنا عليه وليه؟، وإيه الخطوات اللي هتتعمل، يفضل جدا لو في مجال عمل إننا نكتب الكلام ده ويبقى متاح للجميع.
- مش فاضل غير أننا نتابع تنفيذ الحل، ولو لقينا أي تأخير أو حيود عن الخطة ناخد إجراء تصحيحي، كمان لو حصل تغيير في المشكلة أو جدت معلومات ممكن نكرر تاني الخطوات دي ولكن بطريقة أسرع بحيث نتكلم في المتغيرات فقط وندرس تأثيرها علينا.
مهم جدا الناس تشارك في حل المشاكل واتخاذ القرار وميبقاش رأي فردي، لأن ده بيزود مسؤوليتهم اتجاه تطبيق الحلول وكمان بيضمن استمرارية الحل ده واستدامته، ده غير الاستفادة من خبرات الناس سواء في جمع المعلومات أو طرح الحلول أو تقييمها.
تعليقات الفيسبوك