أحيانا يتردد الشخص بشأن اتخاذ قرار ترك العمل وتقديم استقالته تحت مسمى "اللي نعرفه احسن من اللي منعرفوش" خوفا من المستقبل، متجاهلا الضغط النفسي والجسدي، ووجوده في مكان غير مناسب له.
ويُقدم مصطفى خليفة، استشاري تطوير الأعمال، 10 أسباب في حالة حدوثها من الأفضل ترك العمل وتقبل أو البحث عن آخر جديد.
1. الشركة اللي إنت فيها أدائها فيه مشاكل وده بيبان من خلال فقد عملاء وتحقيق خسارة في الشركة، مهما كبرت أو صغرت الشركات من أهم أسباب تواجد كل الشركات تحقيق ربح وبالتالي الشركة بتبقى على أعتاب تقليل عمالة أو تغيير نشاط أو إغلاق، لازم تاخد بالك كويس من وضع الشركة في السوق.
2. وصلت لحالة من الروتين صعبة جدا ولفتره طويلة، كلنا بنعمل أعمال روتينية، بس ميبقاش شغلي كله روتيني ولفترات طويلة، يا إما تسعى لتعديل وضعك جوه الشركة، يا إما تسعى في مستقبل خارج الشركة.
3. مفيش أي مسار وظيفي جوه شركتك، مش شايف خطوتك اللي جاية ممكن تبقى إيه، وده بيحصل يا إما شغلتك مش أساسية في شركتك، مثلا مهندس في مستشفى أو دكتور في مصنع، ليك وظيفة بس مالهاش مستقبل جوه، وممكن يكون لعدم تقديرهم لشغلك، وممكن يكون إن الشركة صغيرة ووظيفتك مفيش أعلى منها.
4. عندك إحساس دائم إنك مش عايز تروح الشغل، وعندك ملل ومش سعيد في الشغل، وده ممكن لأسباب كتيرة، زي زمايلك في العمل أو إنه مفيش جديد بتعمله أو علاقتك مع مديرك، وده هنتكلم عنه في نقطة منفصلة.
5. محتاج تنتقل بعيلتك من مكان لمكان، ممكن بسبب ظروف عائلية أو أسرية، عائلية مقصود بيها العيلة الكبيرة "والدك ووالدتك وإخواتك"، أو أسرتك "زوجتك وأولادك"، وهنا محتاج تغير شغلك في مكان مناسب، لو حابب شركتك وليك مستقبل فيها حاول تتنقل جواها لو ليها فرع قريب مثلا.
6. ظروف عمل صعبة سواء بتأثر على صحتك أو أعصابك، فيه شغل بيأثر على صحتنا، وفي وظايف بتجهد الأعصاب، ودي لازم منطولش فيها، ممكن نشتغل فيها لفترة عشان نتعلم منها حاجات، ولكن مفضلش شغال فيها لفترات طويلة.
7. عرض عمل مناسب جدا.. وهنا لازم تقييم عرض العمل الجديد مش بس على قيمة المرتب.. اسم الشركة اللي شغال فيها وعلامتها التجارية له قيمة، مكان الشركة ومشوارك كل يوم رايح جاي لي قيمة، أن الشركة بتديك تدريب وبتطور منك ده له قيمة، التأمين الصحي والبدلات لها قيمة، المسمى الوظيفي بتاعك ليه قيمة، المسار الوظيفي ووضوح خطوتك الجاية حتى لو بعد سنتين تلاتة له قيمة، جمعة وسبت إجازة ولا جمعة بس لأن راحتك لها قيمة، لازم تقيم أي عرض بناء على البنود دي كلها، وتشوف المميزات والعيوب بناء على أهمية كل نقطة بالنسبة لك، ممكن تروح شغل بمرتب أقل عشان هتتعلم حاجة جديدة أو هتشغل شغل بتحبه.
8. علاقتك مع مديرك متوترة أو مش كويسة، ده ممكن يكون بسبب تقصير منك أو أسلوب منه، وممكن تكونوا إنتوا الاتنين تمام بس الأساليب مش متفقة مع بعضها وفيه خلاف في وجهات النظر، هنا لازم تفكر هل محتاج تغير وظيفتك جوه الشركة ولا تروح شركة تانية.
9. لقيت فيه حاجات بتتعمل في الشركة مش متناسبة مع قيمك وأخلاقك، لازم تحس بالفخر من كونك فرد في الشركة قدام صحابك وقرايبك، لو حاسس إن فيه حاجة بتتكسف منها يبقى الأفضل تشوف مكان تاني.
10. الشغل اللي بتشتغله مش هو اللي نفسك تعمله، عايز تعمل حاجة تانية وشايف إمكانياتك فيها، النقطة دي من النقط اللي بتخدعنا كتير، كلنا شايفين نفسنا في حاجات تانية بس الأهم هل هبقى متميز فيها ولا لأ، وهل عاجباني عشان أسهل وخلاص ولا عشان فعلا حاببها، لأن التميز في شغلانة وفهمي ليها هيخلي مستقبلي أفضل، هنا بننصح الناس دايما إنك لو حاسس أن فيه شغلانة أحسن ليك وحاببها، جربها جنب شغلك الحالي حتى لو بدون مقابل مادي وفي وقت فراغك، جرب وشوف هتلاقي نفسك فيها ولا لأ.
دي أسباب تخليك تغير شغلك، بس لازم نفكر هو أنا محتاج أغير شركتي ولا وظيفتي؟ في بعض الشركات بيبقى فيها فرص داخلية ممكن اتحرك فيها، الأهم أن انتقالي من شغل لشغل يبقى فيه حرص، لأن مسئولياتك سواء صغيرة أو كبيرة لازم يبقى معمول حسابها، وكمان لازم تسيب علاقات طيبة سواء وإنت بتسيب شغلك أو بترفض عرض جاليك.
تعليقات الفيسبوك