​

"القيادة".. هي من أصعب الأعمال التي يمكن للفرد أن يتقلدها أو يقوم بها، حيث سيصبح قدوة لأخرين، وحينها يقع عليه عبء المسؤولية التي تجعله رائداً قوياً حينما يمارسها بشكل جيد.

ويُقدم مصطفى خليفة، استشاري تطوير الأعمال، بعض الخطوات والأشياء التي يجب للقائد معرفتها لتميزه وسير العمل بشكل صحيح.

-  من المهم جدا في إدارة الاعمال أننا نتعلم فنون القيادة عشان نعرف ندير فريق العمل بتاعنا في الشغل بشكل صحيح ونطلع منهم أفضل نتايج مع الحفاظ عليهم وتحقيق رضاهم في نفس الوقت.

-  القيادة ليها أدوات أساسية لازم نعرفها.. ونعرف امتى نستخدمها.. فلازم نتعرف على أعضاء فريق العمل من ناحية قدرتهم على أداء المهام المختلفة ورغبتهم في العمل.

-  لو عندهم القدرة والرغبة يبقى نفوضهم في المهام بتاعتهم ونديلهم الصلاحيات لأنهم عايزين يشتغلو وعارفين يشتغلوا إزاي.

-  لو عندهم القدرة بس معندهمش رغبة نشجعهم.. ونستخدم معاهم أدوات التحفيز المختلفة زي الثواب والعقاب.

- لو عندهم الرغبة ومعندهمش قدرة يبقى ندربهم ونديهم تدريب.

-  لو معندهمش لا قدرة ولا رغبة يبقى لازم توجيه وتوعية عن أهميه الشغل وكمان تدريب عن الشغل نفسه.

- لازم نتطور من أننا نكون مديرين عاديين بيهتموا بالنتايج فقط ونبقى قادة، والحقيقة أوقات بنعتبر المدير حاجة والقائد على النقيض من المدير وده مش صحيح، القائد الناجح هو شخص قدر يوازن بين كونه مدير للأعمال ومدير للأفراد، وده اللي هنشرحه في النقط الجاية.

- مدير الأعمال هو شخص بيتميز بأنه يقدر يعمل التالي:

1.  يركز على احتياجات العميل والسوق.

2. يحقق نتايج.

3. ينفذ الاستراتيجية الخاصة بالشركة.

4. يحقق نمو لشغله ولنتايجه.

5. يطور من المنتجات والخدمات اللي بيقدمها.

6. يتحكم في التكاليف ويقللها.

7. يحسن من الربحية وبالتالي العائد على الاستثمار.

8. يحسن من التعلم داخل الشركة.

9. يساعد في التحسن المستمر للاجراءات في الشركة.

10. يبقى عنده نظرة وحكم في المواقف المختلفة وقدرة على اتخاذ القرار.

 

- مدير الأفراد هو شخص بيتميز أنه يقدر يعمل الآتي:

1. يحدد أدوار الفريق بتاعه ويحطلهم أهداف.

2. يحط الناس الصحيحة في الأماكن الصحيحه للاستفاده القصوى من قدراتهم.

3. ينمي الأفراد من خلال تدريبهم ووضعم في مهام تساعدهم على النمو.

4. يطور من أداء فريقه من خلال التوجيه الصحيح وإعطاء نصائح.

5. يستجيب بسرعه للمتطلبات والتغيرات.

6. بيتبع القيم الأساسيه الخاصة بالشركة.

7. بيعرف يخلق تابعين لي من خلال مساعدته ليهم وفهمه لاحتياجاتهم.

8. يشجع روح التعاون بين اعضاء الفريق.

9. يساعد في التحسن المستمر للأفراد.

10. يكون نموذج جيد يحتذى به.

- عشان تبقى قائد ناجح لازم توازن بين قوتك في قيادة الأعمال ونجاحك في قيادة الأفراد وده اللي هيخليك تحقق اهدافك وأهداف شركتك وتخلي علاقتك بفريقك متميزة ومحبوب وسطهم.