صداقة منذ الطفولة تمتد لـ15 عاما، لم تضعفها الظروف، على العكس، ساهمت "عشرة العمر" في تقوية ما يربطهم، حيث اهتدى "عز وعمرو وكريم"، إلى مشروع أطلقوا علليه اسم VW cafe، لبيع وجبات وعصائر من خلال سيارة "فولكس" قديمة، تأثرا بعربيات المأكولات المنتشرة في شوارع إيطاليا.
قبل 8 أشهر، قرر عز أنور، خريج تجارة إنجليزي، واثنين من أصدقائه، شراء سيارة "فولكس" لإعداد وجبات وبيعها في المقطم، لكن المهلة التي منحها الحي للشباب بعدم الوقوف في الشارع، دفعتهم للبحث عن محل لبدء مشروعهم: "قالولنا المهلة أسبوعين بس وتدوروا على محل تقفوا فيه بدل العربية، لأن الأكشاك حتى ممنوع تقف في الشارع، وربنا الحمد لله كرمنا وقدرنا نشوف محل صغير ووقفنا العربية قدامه".
إصرار "عز" وأصدقائه "عمرو" و"كريم" باستكمال المشروع، ساعدهم في تطوير الفكرة، فقرروا أن سيارة الفولكس تكون لإعداد الطعام، والمحل يكون مخصص لاستضافة الزبائن، بحسب "عز": "فكرنا منعملش أزمة في الشارع ونوقف الزباين على العربية زي باقي العربيات، فكرنا نعمل حاجة مختلفة وبقينا نشتغل بإيدينا نطبخ ونعمل السندوتشات وكمان العصاير، لحد ما بقت الناس تجيلنا من بعيد وأماكن مختلفة مخصوص عشان ياكلوا عندنا".
لم يتوقف حلم "عز" وزملائه عند سيارة "الفولكس" في المقطم، قرروا تكرار التجربة حتى أصبح حلمهم حقيقة: "بقى عندنا 3 فروع، 2 في المقطم وواحد جديد، لسا فاتحين في شارع الفلكي بوسط البلد، بنشتري العربية قديمة ونصلحها ونبدأ نشتغل عليها، والحمد لله ربنا كرمنا وبنفتح قدام كل عربية محل صغير نستقبل فيه زباينا، وحلمنا نبقى سلسة مطاعم كبيرة، وإحنا عشان أكتر من الاخوات ربنا بيكرمنا، لأن حلمنا واحد، أنا مخلص تجارة إنجليزي، وكريم تجارة برده وعمرو آخر سنة السنادي في هندسة".
يقول عز: "بقالنا 8 شهور والحمد لله قدرنا نفتح 3 فروع، لأننا بنتعاون في كل حاجة، وعاملين حصالة بنحط فيها اللي كسبناه في اليوم، بناخد اللي هنحتاجه عشان نشتري اللي ناقصنا والباقي بيتقسم علينا إحنا الـ3".
تعليقات الفيسبوك