​

اشتهر الكوميديان إسماعيل ياسين بـ "بقه" الذي تندر عليه كثيرا، فما هي قصة "بق" إسماعيل ياسين؟ ومن أين جاءت؟ هذا ما أجاب عنه الفنان الراحل في في لقاء نادر بالبرنامج الإذاعي "جرب حظك"، مع الإعلامي طاهر أبوزيد سنة 1957، حاملا البهجة والمرح في بعض الحديث، والصدق والألم في بعضه الآخر، ليعيش الجمهور لحظات جميلة مع "أبوضحكة جنان".

وإلى نص الحوار..

*المذيع: أستاذ إسماعيل أنت باستمرار بتظهر قدام الناس ومتهيألي إنك متنكر، في حاجة على الأقل في سنك فممكن تجرب حظك وبالمناسبة دي تقلنا سنك؟

-إسماعيل ياسين: يعني في 16 سبتمبر 1957، يبقى عندي كدة يا أخويا بالتمام والكمال 45 سنة.

*المذيع: بسم الله ما شاء الله، عيني عليك باردة، مش باين عليك خالص؟

-إسماعيل ياسين: خارجيا مش باين، لكن داخليا باين جدا، الصبغة يا أستاذ طاهر مبتخليش حد يبقى عنده 45 سنة.

(تنفجر قاعة المسرح بالضحك)

*المذيع: سمعناك كتير قوي بتضحكنا لكن مش قادرين نفهمك أبدا؟

-إسماعيل ياسين: ليه يعني لغز.

*المذيع: مكنش في أي موقف بتبان فيه بتتكلم جد.. فإحنا بنحاول نكتشف ده معاك؟

-إسماعيل ياسين: في الحقيقة، تملي شعبي العظيم بيشوفني إنسان ضاحك، لأن هو اتعود أنه يشوفني بضحكهم، إنما يعني إذا جيت للحقيقة، الفنان ليه متاعبه وله مصايبه وله حياته الخاصة، لو عرف بيها الشعب، لازم يتعب معاه، وزي ما بيشاركوا في ضحكه، أؤكدل لك إنه هيبكي مطرحه وبداله 100%.

*المذيع: إنت دلوقتي في القمة من حيث فنك وشهرتك وثروتك، لكن يمكن ورا القمة دي طريق طويل من الكفاح هل أنت تعبت في بدء حياتك وكيف كانت ظروف نشأتك؟

- ظروف نشأتي.. أنا من مدينة السويس، وأخدت 6 جنيهات من ستي أم أمي، وهربت على مصر، ناس قالولي صوتك حلو، فجيت هنا على معهد الموسيقى، لقيته قافل لإننا كنا في الصيف، وده وأنا عندي 17 سنة، وجيت هنا شاب وطايش، وكان معايا 6 جنيهات طبعا أنا مبشفهمش ضيعتهم، وبقيت محتاس في مصر أروح فين وأجي منين، كان ليا ولاد خال كانوا بينزلوا عند والدي باستمرار وكان بيكرمهم، فروحت أول ما شافوني، قالولي جاي ليه، قلت لهم جي ليه؟ "قريبكم"، فسألوني جاي فسحة؟، قلتلهم في ناس قالولي روح معهد الموسيقى علشان تتعلم، واحدة قلت لي: "لا يا أخويا"، إحنا منحبش يكون في عيلتنا مطرب، قال يعني المطرب ده مخدرات، سبتهم ومشيت في الشوارع، مش قادر أقولك كنت بنام فين، علشان دي كانت حاجة مؤلمة طبعا، فالحقيقة كنت ألف طول النار، ومكنش ليا شغل، وبالليل كنت بنام في السيدة زينب، والراجل الإمام بتاع الجامع يرفصني ويقولي قوم، لحد ما علموني، وكانت السيدة زينب بتبقى طول الليل فاتحة، بس الظاهر على قدمي أنا بقوا بيفتحوها الفجر بس، وطردوني من السيدة زينب، روحت جامع تاني اسمه "مراسينا"، استخبيت ورا الباب من تعبي نمت، لقيت واحد بيصحيني، بقول له أفندم: قالي إنت سرقت طقم الشاي ولازم نوديك في داهية، قلت له: والله أنا أول مرة أنام عندكم، إمام الجامع كان طيب حكيت له حكايتي، فخدني معاه البيت وغسلي هدومي، وإداني أجرة القطر وسفرني، ولما رجعت السويس، لقيت أبويا بدل ماكان عنده محل كبير، بقى عنده محل صغير وبيشتغل بإيده علشان خاطري، والنبي شكلي هعيط وبكى، وإذا كنت بتوصفني دلوقتي مرفه شوية، ده لأن يمكن ربنا بيديني لأني شقيت واستحملت كتير.

*المذيع: فيه نقد بيوجه للسينما والوجوه مبتتغيرش، ويوجه ده عليك أنت بالذات إنك بتظهر في 17 أو 18 فيلما، فبتستهلك الوجوه.. أيه رأيك؟

-إسماعيل ياسين: أقول لك يا سيدي، المنتج ميحبش يجيب حد جديد، يقولك لسه هعلم وأطور وأبيع في سوريا ولبنان، وياترى الاسم هيبيع، أنا أتعب نفسي ليه، أنا أجيب إسماعيل على خليل على سيد على محمود، هوب بقا فيلم، وفي حاجة كمان لو كان في طولة بال من المنتج والمخرج، هتخرج ناس جديدة للنور.

*المذيع: إيه اللي في وشك بيجذب؟ -إسماعيل يس: هما قالول لك أهو "بقه".

*المذيع: أيه أثر بقك في حياتك؟

-إسماعيل ياسين: أبدا.. كنت بمثل فيلم وكانوا مسميني فيه "بقه"، ومن هنا مشيت حكاية بقه، لكن لما تبص حضرتك لبقي متلقهوش أبدا، ولما لقيت الناس بيحبوا يعاكسوني ببقي، فعملت مونولوج عن بقي، ومثلت ببقي، ومن هنا بقيت أستغل بقي.

*المذيع: أيه أول مونولوج في حياتك؟

-إسماعيل ياسين: مونولوج اسمه، يا أخواتي مراتي سبور وأنا عايش زي الطور، ده كان مونولوج للأستاذ أبوبثينة محمد عبدالمنعم، ده من الناس اللي وجهتني من المغنى للمونولوج، لأني لو عشت لحد دلوقتي بغني كان زماني بشحت.

*المذيع: ممكن تقولنا حته منه؟

-إسماعيل ياسين: لا يا أخويا "يا إخواتي مراتي سبور وأنا عايش زي الطور، لما تحب تدلعني تحدفني لرابع دور، يا أخواتي مراتي سبور".