معرض بات قبلة لمحبى القراءة من منطقة شبرا، بعد أن أتاح لهم صاحبه فرصة شراء الكتب التى يحتاجونها، دون عناء الذهاب إلى سور الأزبكية بالعتبة، وبأسعار مخفّضة ومجانية لأهالى المنطقة.
«مفيش كتاب فى السوق عامل مبيعات كبيرة مش عندى»، يقولها باسم عوض، صاحب المعرض الدائم بمنطقة روض الفرج، فمنذ 10 سنوات، وهو يفترش المنطقة أمام باحة مسجد الخازندار بالكتب الخاصة به، حتى أصبح المكان مركزاً للشباب من محبى الكتب القديمة والنادرة، وأيضاً حديثة الإصدار. فصل الصيف موسم بالنسبة لـ«باسم»: «الشباب بيقبلوا على القراءة فى الصيف، وباعمل عروض مختلفة بتجذبهم. هدفى أرجّع الناس للقراءة، خاصة الشباب».
يظل «باسم» ساعات طويلة، يرتب أرفف المعرض، ليُسهل عملية البحث عن الكتب على زبائنه، خاصة الأطفال: «باحب الكتب جداً، وباهتم بترتيبها أبجدياً، علشان أوفر على الناس عناء البحث». وحسب «باسم» فإنه يقوم بإنتاج بعض الكتب لصغار السن: «باساعد الكُتّاب صغار السن على إصدار كتب، وبانتجها ليهم، من خلال دار الفيروز الثقافية للنشر».
«الناس اتعودت عليا، ولما باقفل المعرض يوم بالاقيهم بيكلمونى»، يرويها «باسم» بنبرة فرحة: «حابب جداً الحالة اللى بينى وبين الناس فى المنطقة، كلهم جيرانى، خصوصاً إننا بقينا فى زمن انقرضت فيه الكتابة، وبقى قليل جداً لما تلاقى حد عنده شغف قراءة كتب وروايات. باحزن لو لاقيت الكتب مرصوصة على الرف، ومش لاقية اللى يفتحها». كما يقدّم «باسم» خدمة استعارة الكتب بالمنطقة: «باسمح بالاستعارة لجيرانى، والناس اللى أعرفهم فقط، وهدفى أن الكل يستفيد».
تعليقات الفيسبوك